Град Скопје им оддаде признание на најдобрите ученици од средните училишта на манифестацијата „Првенец на генерација“, што се одржа во вторникот вечерта. Годинава, по првпат, секој првенец на генерација добива и лаптоп – алатка што ќе им помогне да продолжат да учат, истражуваат, создаваат и да ги развиваат своите таленти. Тоа, како што истакна скопскиот градоначалник, Орце Ѓорѓиевски, е признание за трудот, знаењето и за посветеноста.
– Ова е порака дека нивниот труд се вреднува, нивниот успех се почитува и дека Градот Скопје верува во нивната иднина и секогаш ќе биде нивна поддршка. Образованието е најсилната инвестиција во иднината. Токму преку знаењето, трудот и воспитувањето се градат генерации кои утре ќе ја водат Македонија напред со идеи, со чесност, со работа и со љубов кон својата земја – нагласи Ѓорѓиевски.
Тој најави дека поддршката на Град Скопје за образованието ќе продолжи и преку организирање научно-наставен камп, летување за талентирани ученици и ученици од социјално загрозени семејства, потоа со обезбедување бесплатни униформи, современи лаборатории, подобри услови во училиштата, уредени дворови, нова урбана опрема, спортски комплекси, топлотни пумпи, фотоволтаици итн.
– Силно вложуваме во образованието, затоа што иднината на Скопје и Македонија започнува токму од училишните клупи – дециден е Ѓорѓиевски.
Тој на првенците им порача да го следат својот сон, да веруваат во себе и никогаш да не се откажуваат од она што ќе ги движи напред.
– Секој голем успех започнува со храброст да се сонува и со упорност тој сон да се оствари. Верувам дека меѓу вас се идните професори, лекари, инженери, уметници, спортисти, научници, претприемачи и лидери кои ќе ја градат иднината на Скопје и на Македонија. Бидете горди на себе, но останете скромни. Бидете амбициозни, но останете луѓе. Продолжете да учите, да сонувате и да чекорите храбро напред – наведе Ѓорѓиевски.
Тој им честита на сите првенци на генерацијата, на нивните родители и наставници и им посака многу успеси во иднина и убав, радосен и заслужен летен одмор.
