Европа „исклучена“ од преговорите за Украина: „Можат да дојдат ако си купат билети“

Европските претставници нема да учествуваат во трилатералните технички преговори меѓу Украина, САД и Русија, кои се закажани за следниот месец. Ова го изјави Јуриј Ушаков, помошник на рускиот претседател. Според него, договорено е разговорите да се одржат без учество на европски претставници, пренесува „Правда“.

„Можат да дојдат ако си купат билети, но никој нема намера да ги покани на преговарачката маса“, рече Ушаков.

Рускиот функционер не ја потврди изјавата на украинскиот претседател Володимир Зеленски дека техничките преговори би можеле да се одржат на 10 ноември. Тој додаде дека датумот на средбата наскоро ќе биде објавен.

Ушаков претходно најави дека Русија е подготвена, по 4 ноември, да ги продолжи трилатералните преговори со САД и Украина во врска со ставање крај на војната.

Зеленски, пак, изјави дека постојат индиции оти Москва сериозно размислува за одржување средба на преговарачките тимови во Абу Даби, по разговорите меѓу европските лидери и рускиот претседател.

Украинскиот претседател додаде дека одржувањето на трилатералната средба на техничките тимови од Украина, САД и Русија – планирана за почетокот на ноември – зависи од Соединетите Држави.

„Телеграф“ објави дека Русија би можела да се обиде да ја искористи новата рунда мировни преговори за да издејствува отстапки од НАТО.