Забраната на Талибанците не го запре опиумот: Одгледувањето во Авганистан е зголемено за 330 отсто

Производството на опиум во Авганистан, земја со која владеат Талибанците, нагло порасна – зголемувајќи се петкратно во споредба со истиот период минатата година – се наведува во извештајот на Канцеларијата на ОН за дрога и криминал (UNODC) со седиште во Виена. Талибанците го забранија производството на дрога во 2022 година и уништија огромни површини на полиња со афион.

Сепак, извештајот на UNODC сега укажува на зголемување на одгледувањето за 330%, при што површините засадени со афион се прошируваат и во други провинции. Опиумот се добива од млечниот сок на афионот.

Ова четирикратно зголемување на одгледувањето афион ја истакнува тешкотијата за постигнување долгорочно намалување на нелегалното производство на опиум, особено кога осиромашените земјоделци немаат средства да ги прехранат своите семејства, истакна претставничката на UNODC, Моника Џума.

Авганистан моментално се соочува со тешка хуманитарна криза, при што многу луѓе се борат да обезбедат храна. Кога Талибанците ја воведоа забраната за одгледување афион, земјоделците во голема мера останаа без никаков надомест и не им беа понудени алтернативни извори на приход.

Иако производството на опиум останува значително под нивоата забележани пред воведувањето на забраната, вкупниот приход за посредниците во текот на предметната година се проценува на 525 милиони долари – што е приближно враќање на просечните нивоа забележани во периодот помеѓу 2018 и 2021 година, се наведува во извештајот на UNODC. Цените на опиумот, исто така, пораснаа во последните години, делумно поради тоа што забраната во Авганистан предизвика недостиг.

Авганистанскиот министер за надворешни работи, Амир Кан Мутаки, во вторникот изјави дека напорите за сузбивање на производството на дрога треба да се координираат со соседните земји, пренесе медиумот „Толо њуз“ (Tolo News).

Во август, Дејвид Менсфилд, водечки експерт за одгледување афион во Авганистан, користејќи сателитски податоци, утврди зголемување на производството на опиум и во соседните земји, Иран и Пакистан.