Алармантна прогноза: „Супер Ел Нињо“ би можел да однесе над 850.000 животи ширум светот

Климатскиот феномен „Супер Ел Нињо“ би можел да предизвика повеќе од 850.000 дополнителни смртни случаи поврзани со горештините ширум светот во периодот од јуни 2026 до март 2027 година. Според проекциите на американската истражувачка организација „Climate Impact Lab“, најтешко погодени би можеле да бидат Нигерија, Индија и Индонезија.

Само во шестмесечниот период од октомври 2026 до март 2027 година, бројот на дополнителни смртни случаи поврзани со високите температури би можел да надмине 373.000. Според проценките, Нигерија, Индија и Бразил би можеле да бидат одговорни за околу една третина од вкупниот број.

Како што пренесува „Њујорк пост“ (New York Post), проценките се дел од проектот „El Niño Heat Mortality Tracker“, кој го следи влијанието на феноменот Ел Нињо врз смртноста поврзана со горештините во околу 3.700 региони во светот. Моделот се ажурира секој месец и нуди прогнози за следните шест месеци.

Најновите податоци укажуваат на значително влошување на прогнозите во споредба со претходниот месец, кога беа предвидени помал број дополнителни смртни случаи.

Нигерија и Индија меѓу најпогодените земји
Според најновите проекции, Нигерија би можела да биде најтешко погодена, со повеќе од 56.000 дополнителни смртни случаи поврзани со горештините во следните шест месеци. За Индија се предвидуваат околу 55.200 смртни случаи.

Меѓу другите земји изложени на висок ризик се: Индонезија: околу 29.300 дополнителни смртни случаи, Бразил: околу 19.500 и Судан: околу 14.700.

Истражувачите ги направиле проценките споредувајќи ја очекуваната смртност за време на актуелниот феномен Ел Нињо со просечната смртност во периодот од 1996 до 2005 година.

Мајкл Гринстоун, коосновач на „Climate Impact Lab“ и професор по економија на Универзитетот во Чикаго, оценува дека можноста однапред да се предвидат смртоносните последици од екстремните горештини претставува значаен напредок.

Ваквите прогнози овозможуваат навремено да се идентификуваат најризичните подрачја и им даваат можност на властите да преземат превентивни мерки пред да дојде до загуба на човечки животи.

Според проценките на истражувачите, Ел Нињо веќе придонел за приближно 484.500 смртни случаи ширум светот од јуни 2026 година.

Што е „Супер Ел Нињо“ и какви последици носи?

Ел Нињо е климатски феномен поврзан со невообичаено затоплување на површинските води во тропскиот дел на Тихиот Океан. Тој може да влијае врз временските обрасци во различни делови од светот, предизвикувајќи екстремни горештини, суши, обилни врнежи и други временски непогоди.

Во регионот Нињо 3.4, кој се наоѓа во централниот и источниот екваторијален дел на Тихиот Океан, температурата на морската површина во неделата од 18 до 24 октомври била за 3,4 степени Целзиусови над нормалата. Во извештајот, ова отстапување е опишано како рекордно високо.

Според Светската метеоролошка организација, во периодот од ноември до јануари феноменот би можел да достигне интензитет значително поголем од вообичаениот за Ел Нињо.

Последиците веќе се поврзуваат со шумските пожари во Индонезија, недостигот од клучните монсунски дождови во Индија и сушите во Централна Америка.

Во Соединетите Американски Држави, пак, се очекува западните и јужните делови од земјата да бидат погодени од повеќе бури и пообилни врнежи, додека за Њујорк се прогнозира поблага зима, пренесува Танјуг.