Зеленски: Украина и Германија ќе започнат заедничко производство на дронови и одбранбени системи

Украина и Германија почнуваат да работат на планови за заедничко производство на напредни дронови и други одбранбени системи, изјави денес украинскиот претседател Володимир Зеленски.

Зеленски се сретна со германскиот канцелар Фридрих Мерц во Берлин за ова прашање.

„На Германија ѝ предложивме билатерален договор што вклучува различни видови беспилотни летала, ракети, софтвер и модерни одбранбени системи. Нашите тимови започнуваат со конкретна работа“, рече Зеленски на заедничката прес-конференција со Мерц.

Мерц рече дека посветеноста на Германија да ги поддржи воените напори на Киев е „многу јасен сигнал“ до Русија.

„Нема да попуштиме во нашите напори да ја одбраниме Украина“, рече тој.

Украина има капацитет да произведе двојно повеќе воена опрема отколку што моментално распоредува, но Зеленски тврди дека нема средства за зголемување на производството.

Тој проблем би се решил со добивање на ветен заем од 90 милијарди евра од Европската Унија (ЕУ), кој унгарскиот премиер Виктор Орбан го одложуваше, а кој би можел да биде ослободен ако ја напушти власта по поразот на изборите.

Мерц рече дека на Украина „итно ѝ се потребни“ средствата.

По Берлин, Зеленски треба да ја посети Норвешка, додека претставници на одбраната од повеќе од 50 земји-партнери кои ја координираат вооружената помош за Киев ќе се состанат онлајн утре, соопшти украинското Министерство за одбрана.

Зеленски вчера изјави дека осум земји од Блискиот Исток и Персискиот Залив, како и Турција, Ирак и земји од Југоисточна Азија и Африка, контактирале со Украина во врска со безбедносната соработка, особено производството на беспилотни летала тестирани на бојно поле.