Во Општина Аеродром се реконструираат 19 улици

На територијата на Општина Аеродром, во наредниот период ќе бидат реконструирани вкупно 19 улици.

Реконструкцијата на две веќе е започната, а денеска, во присуство на премиерот Христијан Мицкоски и градоначалникот Дејан Митески, беше означен почетокот на обновата на улицата „Симеон Кавракиров“.

Митески информираше дека целокупниот проект опфаќа улици и пешачки површини во вкупна должина од 5,4 километри.

– Се работи за значаен проект, кој се реализира благодарение на поддршката од Владата. „Симеон Кавракиров“ е третата улица од овој проект, две улици веќе се реконструираат, а до крајот на летото ќе бидат завршени сите 19 – истакна Митески.

Премиерот Мицкоски нагласи дека овие градежни активности се додадена вредност за Аеродром, бидејќи, како што рече, со подобрувањето на инфраструктурата, се подобрува и квалитетот на живот на граѓаните.

– Очекуваме оваа година сето она што беше почнато со првиот и вториот повик, преку Министерството за локална самоуправа, да биде завршено, а следната година да имаме одреден буџет за да објавиме нов повик и за да се реализираат нови проекти во општините – заклучи Мицкоски.

Прашан зошто сè уште не е урната натстрешницата на кафеаната „Прокадеро“ во населбата Острово, иако требало да се случи тоа пред девет месеци, градоначалникот Митески одговори дека е во тек постапката по жалба и не би сакал да избрзува и да доведе до тоа ако се поништи решението од второстепен орган, Општина Аеродром да плаќа штета и повторно да се поведува постапка.

Што се однесува на жалбите од граѓаните за бучавата од кафеаните и локалите, Митески истакна дека тие биле во поголем број пред новогодишните празници.

– Инспекциските служби излегоа на терен, тогаш беа затворени два угостителски објекти и беа изречени повеќе од седум глоби на угостителски објекти што го надминале дозволениот праг на бучава. Во изминативе неколку месеци, нема поплаки за бучава, а инспекциските служби вршат редовни контроли – тврди Митески.

(А. П.)