Нè чека вистинска бура ова лето: Три НБА-суперѕвезди го менуваат клубот?!

Се ближи крајот на уште една НБА-сезона, плејофот почнува овој викенд, а многумина уште отсега се фокусирани на драмата што следува – односно на трансферите што ќе се очекуваат во текот на летото.

Летниот преоден рок во НБА ретко разочарува, а судејќи според најавите, оваа година нема да биде исклучок, бидејќи некои од најголемите играчи би можеле да ја променат средината.

Според инсајдерот од НБА, Марк Штајн, дури три суперѕвезди би можеле да играат за нови тимови следната сезона: Леброн Џејмс од Лејкерс, Каваи Ленард од Клиперс и Јанис Адетокумбо од Милвоки.

• Очекувајте многу разговори за нивната иднина во текот на пролетта. Извори од лигата велат дека во многу клупски канцеларии има зголемено очекување дека двајца, или дури и сите тројца од гореспоменатите великани, би можеле да играат во нови дресови следната сезона, напиша Штајн.

Џејмс (20,9 поени, 6,1 скока, 7,2 асистенции во просек) треба да стане слободен агент ова лето, а неговата иднина со Лејкерс е далеку од сигурна. Иако е при крајот на својата кариера, тој покажа дека сè уште може да игра на високо ниво. Останува неизвесно дали тоа сè уште ќе биде случај во виолетовата и златна боја, а се споменуваше дека би можел да се врати во Кливленд.

Кога станува збор за Ленард (27,9 поени, 6,4 скока, 3,6 асистенции), постојат неколку фактори што би можеле да го оддалечат од Клиперс. Од истрагата на НБА за неговиот договор до пренасочувањето на тимот кон помладите таленти, деновите на 34-годишникот во Лос Анџелес би можеле да бидат избројани. Се споменува можна размена во Голден стејт.

Иднината на Адетокумбо (27,6 поени, 9,8 скока, 5,4 асистенции) во Милвоки се дискутира речиси една година. Тиесет и едногодишниот центар е на излезна врата од Милвоки, а ова лето би можело да донесе конечно заминување. Бакс се разделија со тренерот Док Риверс на последниот ден од регуларната сезона, што би можело да биде знак за големи промени што доаѓаат во Милвоки. Постојат информации дека тој би можел да се приклучи на ЛА Лејкерс и да игра заедно со Дончиќ, и евентуално со Леброн Џејмс доколку остане во тимот.