Тинејџер во Србија доживеа срцев удар за време на топлотниот бран

Седумнаесетгодишно момче од Белград пред неколку дена доживе акутен миокарден инфаркт, по што итно беше префрлено во еден од клиничките центри за понатамошно лекување. Лекарите од Одделот за итни случаи во Белград истакнуваат дека екстремно високите температури можат да бидат еден од факторите што го зголемуваат ризикот од вакви здравствени компликации.

Кардиологот д-р Невена Карановиќ за порталот Nova.rs предупреди дека граѓаните, особено во периоди на екстремна топлина, треба да бидат дополнително внимателни и да се грижат за своето здравје.

Зборувајќи за случајот со малолетниот пациент, таа објасни дека срцев удар може да се случи поради неколку различни околности.

– Кај луѓето кои имаат понизок крвен притисок, високите температури можат дополнително да ги намалат неговите вредности. Исто така, одредени анатомски карактеристики или генетски предиспозиции можат да доведат до намален проток на крв во срцето. Кога срцевиот мускул не прима доволно крв и кислород, може да се развие срцев удар – објасни д-р Карановиќ.

Експертите им советуваат на граѓаните да избегнуваат продолжено изложување на сонце за време на топлотни бранови, да пијат доволно течности и да обрнат внимание на можните симптоми како што се вртоглавица, слабост, забрзано чукање на срцето или болка во градите.