Созовска и Костов го доловија сиот раскош на барокот на автентичен начин

– Инструментот што го користам вечерва е лично мој. Го купив пред три години, во Холандија и го увезов во Македонија за да имам и тука инструмент и за да можам да патувам и да ја презентирам барокната музика во автентичен стил – вели Созовска. Костов, пак, посочи дека специфично е и тоа што свиреле на автентичен штим од 415 херци, карактеристичен за тој период 

Врвните македонски уметници, виолинистот Владимир Костов и чембалистката Цветанка Созовска, завчеравечер приредија несекојдневен музички настан за публиката на „Охридско лето“. На оваа прекрасна вечер во црквата „Света Софија“, тие го доловија сиот раскош на барокот, а концертот почна со едно од најпознатите дела на италијанскиот композитор Антонио Бонпорти, Инвенција оп. 10 бр 4 ге-мол за виолина и басо континуо, а потоа беа изведени композиции од Бах, Вивалди, Верачини, Скарлати и од Бибер. За голема почит е што македонските уметници ги негуваат и делата на македонските композитори, па така Созовска ја изведе Свитата за пијано оп. 27 од истакнатиот македонски композитор Томислав Зографски, за која самата таа ја направи преработката за чембало.

Инаку, врвната чембалистка Цветанка Созовска, која има специјализирано барок, точно три децении живее и работи во Холандија, но ја промовира барокната музика и надвор од холандските граници. За да може да го долови барокот на автентичен начин пред љубителите на класичната музика во Македонија, таа го донесе во земјава и својот личен инструмент.

– Инструментот што го користам вечерва е лично мој. Го купив  пред три години, во Холандија и го увезов во Македонија за да имам и тука инструмент и за да можам да патувам и да ја презентирам барокната музика во автентичен стил, не само во Скопје туку насекаде во земјава. Голема е честа што настапувам и на „Охридско лето“ со мојот инструмент – рече Созовска.

Неа и виолинистот Владимир Костов ги врзува не само виртуозноста над своите музички инструменти туку и големата љубов кон барокната музика. Заедничкото музичко дружење со фестивалската публика тие го изведоа во историски штим од 415 херци, а Костов на концертот користеше и барокно гудало за својата виолина.

-Како што се развивала виолината во текот на вековите така се развивало и гудалото. Ова е еден вид гудало што се користело по форма, големина и должина во тоа време за да се долови тој звук. Исто така, специфично е и тоа што свириме на автентичен штим од 415 херци. Тоа е штим што се изведува со оригиналните инструменти, бидејќи во современата музичка практика инструментите се штимаат на  440 до 442 херци. Овој звук дава посебен амбиент и ѝ дава една посебна интерпретација на барокната музика и уште  поголема автентичност на самите дела – појасни Костов, кој е концерт-мајстор во Македонската филхармонија, но и професор на Факултетот за музичка уметност во Скопје.