Инсајдер: Вучиќ ќе бидe повикан да сведочи во случајот за перење пари против наркобосот Дарко Шариќ

Поранешниот претседател на Србија, Александар Вучиќ, и Марко Парезановиќ од српската Безбедносно-информативна агенција (БИА) ќе бидат повикани како сведоци во судењето против нарко-босот Дарко Шариќ, кој е обвинет за перење најмалку 20 милиони евра стекнати преку трговија со дрога. Оваа одлука доаѓа неколку недели откако истражувачкиот неделник „Радар“ објави серија пораки од криптираната апликација „Скај“ (Sky), во кои се спомнуваат Вучиќ, Парезановиќ и наводни договори меѓу високи српски државни функционери и соработници на Шариќ.

Според извештајот на новинарката на „Инсајдер“, Тамара Марковиќ Субота, судијата Иванковиќ ја соопштил одлуката за повикување на Вучиќ и Парезановиќ за време на рочиштето во процесот против Шариќ и другите обвинети за перење пари.

Сите обвинети ја напуштиле судницата, додека нивните бранители останале внатре, пренесе „Инсајдер“.

Сè уште не е објавено кога се очекува Вучиќ и Парезановиќ да сведочат, ниту пак за кои конкретни околности судскиот совет планира да ги испраша. Тоа што се повикани како сведоци не значи дека тие се обвинети во оваа постапка.

Судењето трае уште од 2010 година

На Дарко Шариќ и на другите обвинети им се суди пред Посебното одделение на Вишиот суд во Белград под сомнение за перење најмалку 20 милиони евра стекнати преку трговија со дрога. Овој случај е еден од најдолготрајните пред тој суд. Обвинението беше поднесено уште во 2010 година, а десет години подоцна, Шариќ беше осуден на девет години затвор со првостепена пресуда.

Сепак, во 2022 година, Апелациониот суд ја укина пресудата, оценувајќи ја како нејасна и контрадикторна, и наложи ново судење.

Судијата Синиша Петровиќ, кој претседаваше со советот при изрекувањето на првостепената пресуда, тогаш тврдеше дека е докажано оти парите со кои располагал Шариќ потекнуваат од трговија со кокаин. Сепак, со укинувањето на таа пресуда, постапката беше вратена за донесување нова одлука. „Радар“ објави пораки од „Скај“: Вучиќ бил нарекуван „Оскар“ и „Чварак“

Повикувањето на поранешниот претседател на Србија да сведочи е особено интересно во светлината на истражувањето на неделникот „Радар“, кој на 15 и 22 октомври објави претходно непознати делови од комуникација преку апликацијата „Скај“. Новинарите Вук З. Цвијиќ и Милан Радоњиќ објавија пораки за кои тврдат дека биле разменети меѓу Дарко Шариќ, неговиот брат Душко, братучедот Жељко Вујановиќ и други соработници.

Во тие пораки се појавуваат прекарите „Оскар“ и „Чварак“, за кои „Радар“ тврди дека се однесувале на Александар Вучиќ.

Во порака од 3 јуни 2020 година, Шариќ директно му објаснува на својот братучед дека под прекарот „Оскар“ мисли на Вучиќ. Во друга комуникација, од ноември истата година, прекарите „Оскар“ и „Чварак“ се изедначуваат.

Врз основа на овие пораки, „Радар“ истражуваше можни контакти меѓу членови на криминалната група на Шариќ и поединци блиски до тогашниот државен врв.

Наводни ветувања во врска со пресуда и помилување

Во текст објавен на 15 октомври, насловен „Скапото ветување на Оскар за Шариќ“, „Радар“ изнесе тврдења за наводни договори чија цел била да му обезбедат на Шариќ поповолна положба во правосудниот систем. Според објавените комуникации од „Скај“, соработниците на Шариќ разговарале за аранжман според кој тој би им се предал на српските власти во 2014 година, под однапред утврдени услови. Тие наводни услови вклучувале казна затвор од десет години, ослободување од обвиненијата за перење пари и враќање на дел од неговиот запленет имот.

Во преписката се спомнува и ветување – дадено од лице идентификувано со прекарот „Чварак“ – дека сите евентуални проблеми поврзани со судиите или со казната би можеле да се решат преку помилување.

„Радар“ известува дека пораките укажуваат на контакти меѓу посредниците на Шариќ и поединци во рамките на правосудството и безбедносниот апарат.

Во пораките се спомнува и финансирање на политичката партија на Вучиќ.

Посебно внимание привлече една порака која, според „Радар“, Дарко Шариќ ја испратил во ноември 2020 година. Во неа тој тврди дека обезбедил средства за политичка партија преку посредник идентификуван како „Уликс“. Спомнат е износ од 2,1 милион, но сепак, врз основа на објавениот дел од пораката, невозможно е независно да се потврди дали парите навистина биле предадени, на кого им биле доставени или во која валута.

„Радар“ ја поврзува оваа комуникација со Српската напредна странка (СНС), тврдејќи дека Шариќ бил еден од нејзините финансиери.

Други пораки содржат наводи за контакти со братот на Вучиќ, Андреј, и неговиот син, Данило, како и разговори во врска со потенцијалното собирање гласови.

Кој е Марко Парезановиќ и зошто се спомнува во преписката преку апликацијата „Скај“?

Марко Парезановиќ – уште едно лице кое судот има намера да го повика како сведок – исто така се појавува во истражувањето на „Радар“. Според неделникот, соработниците на Шариќ во своите комуникации го нарекувале со имињата „Марко“, „Маркус“ и „Маркос“.

„Радар“ тврди дека Парезановиќ, во својство на високорангиран функционер на БИА, служел како врска помеѓу најтесниот круг на Шариќ и тогашното политичко раководство. Во пораките објавени од „Радар“ се спомнува и сума од 100.000, која, според Душко Шариќ, наводно била префрлена на лице поврзано со БИА (Безбедносно-информативна агенција).

Во комуникациите од 10 и 20 мај 2020 година, Душко Шариќ разговара за трансфер на пари и за лице кое го нарекува „Маркус“. „Радар“ го поврзува овој прекар со Парезановиќ.

Истражувачките извештаи покренуваат низа прашања

Во вториот дел од своето истражување, објавен на 22 октомври, „Радар“, исто така извести за комуникација преку „Скај, во врска со наводни врски меѓу поединци од кругот на Шариќ и ривалскиот клан „Шкаљари“. Според овие пораки, одредени членови на криминални групи се фалеле дека имаат контакти во државниот врв, притоа спомнувајќи политички договори и можна заштита. Овие наводи покренаа прашања за можните врски помеѓу организираниот криминал и политиката, полицијата, безбедносните служби и судството.