Се отвораат можности за современо уредување и за подобра организација на просторот околу Калето

Советот на Општина Центар, на последната седница, донесе два нови детални урбанистички плана, за Градска четврт ЦС 14 „Кале и СРЦ Кале“ и за Градска четврт ЦС 01 „Француски гробишта, Тетовска трошарина и Парк 2“.

Донесувањето на овие ДУП-ови претставува усогласување со Генералниот урбанистички план на Град Скопје 2012–2022 година. Дополнително, по првпат се носи детална урбанистичка документација за просторот околу Калето, со што се отвораат можности за современо уредување и подобра организација на просторот.

Со новите планови се унапредува сообраќајната и пешачката инфраструктура, а се предвидуваат и нови велосипедски патеки на главните улици „Самоилова“ и „Лазар Личеноски“. Тие ќе се поврзат со рекреативната патека покрај Вардар, со цел да се обезбеди функционална велосипедска мрежа на растојание од 200 до 300 метри. Предвидено е и подобрување на условите за пешаците, со пошироки тротоари и нови дрвореди.

Од Општина Центар информираат дека на најатрактивниот дел покрај Вардар приоритет ќе имаат пешаците, со дозволен пристап на возила само за објектите кои имаат одобрение за градење со такви услови.

Притоа, наведуваат дека во планот за ДУП Градска четврт ЦС 01 се предвидува спортски објект на државно земјиште покрај кејот, со површина од 9.295 квадратни метри. Во претходниот план, на истиот простор беа предвидени хотелски комплекси.

Според  општинските власти, со ДУП Градска четврт ЦС 14, на приватното земјиште под Калето се планира изградба на пониски хотели со приземје и три ката, додека на државното земјиште се предвидува парковско зеленило со површина од 3.074 квадратни метри. Воедно, јужно од планираниот профил на булеварот „Климент Охридски“ се планираат содржини од јавен интерес , парковско зеленило со површина од 2.280 квадратни метри и јавен паркинг со површина од 3.765 квадратни метри.

–Со ДУП Градска четврт ЦС 14 по првпат на ниво на детално планирање се разработува просторот на Скопското Кале. Планираме да создадеме поврзан, уреден и инклузивен простор. Предвидуваме и можност за поставување музејски изложби на отворено, со што овој симбол на Скопје, богат со историја и култура, ќе го доближиме уште повеќе до граѓаните и посетителите. При подготовката на планот ги земавме предвид и сугестиите на стручните лица од Музејот на современа уметност – нагласи градоначалникот на Општина Центар, Горан Герасимовски.

(А. П.)