Тунис се најде во центарот на вниманието на Светското првенство, но не поради резултатите на теренот, туку поради можните големи промени во стручниот штаб. Според повеќе меѓународни медиуми, селекторот Сабри Ламуши е на чекор до заминување по тешкиот пораз од Шведска со 5:1 во првото коло од групната фаза.
Убедливиот неуспех предизвика незадоволство кај челниците на Федерацијата, кои наводно веќе размислуваат за промена на кормилото среде турнирот. Како главен кандидат за преземање на репрезентацијата се споменува искусниот француски стратег Ерве Ренар, еден од најреномираните тренери што работеле во африканскиот фудбал.
Ренар во минатото ја водеше и репрезентацијата на Саудиска Арабија, а неговото име често се поврзува со големи успеси на африканскиот континент. Токму затоа тој е прв избор во обидот да се спаси настапот на Тунис на Мундијалот.
Интересно е што сè уште нема официјална потврда за заминувањето на Сабри Ламуши. Напротив, француските медиуми тврдат дека тој продолжува да ги води тренинзите на националниот тим, иако шпекулациите за неговото разрешување се сè погласни.
Доколку дојде до промена на селекторската позиција во текот на натпреварувањето, Тунис би можел да стане првата репрезентација во историјата на светските првенства што назначила нов тренер среде самиот турнир.
Распоредот дополнително ја отежнува ситуацијата. Во следното коло, Тунижаните ги очекува пресметка со Јапонија, а потоа и дуел со Холандија. Тоа значи дека евентуалниот нов селектор би имал многу малку време за адаптација и за подготовка.
По само еден одигран натпревар, Тунис веќе се соочува со сериозна криза, а наредните денови би можеле да донесат една од најнеобичните приказни во историјата на светските првенства.
