По неодамнешните напади врз нивите нафтени постројки, Иран се заколна дека ќе „изгори сè до темел“

Иранските власти издадоа остро предупредување дека, како одговор на неодамнешните напади врз нивните нафтени постројки, ќе „изгорат сè до темел“ енергетската инфраструктура на нивниот противник, дополнително зголемувајќи ги тензиите во веќе нестабилниот регион на Блискиот Исток, пренесе „Гардијан“.

Според иранската државна новинска агенција ИРИБ, претставник на централниот штаб на вооружените сили на Исламската Република, „Хатам ал-Анбија“, изјави дека на секоја понатамошна агресија ќе биде одговорено со директни напади врз клучните енергетски системи на оние што стојат зад нападите врз иранските постројки.

„Им кажуваме на кукавичката и агресивна армија на криминална Америка и на суровиот ционистички режим кој убива деца дека ќе бидете принудени да ги фрлите вашите војници во вода и да го изгубите достоинството“, се вели во соопштението, додавајќи дека тоа е јасно предупредување до сите оние кои, како што тврди Техеран, учествувале во нападите врз енергетската инфраструктура на југот од земјата.

Иранскиот функционер нагласи дека, во случај на продолжување на нападите, цел на одмазда ќе биде „инфраструктурата за гориво, енергија и гас поврзана со изворите на агресија“, додавајќи дека таквите објекти ќе бидат уништени „што е можно поскоро“.

Овие закани доаѓаат во време кога Техеран веќе најави можни напади врз нафтениот сектор во земјите од Персискиот Залив, вклучувајќи ги Катар, Саудиска Арабија и Обединетите Арапски Емирати. Според иранските медиуми, ескалацијата следеше по нападот што им се припишува на американските и израелските сили врз нафтените и гасните полиња Јужен Парс, едно од најважните енергетски наоѓалишта во регионот.

Аналитичарите предупредуваат дека понатамошната ескалација може да има далекусежни последици за глобалните енергетски пазари, со оглед на стратешката важност на Персискиот Залив како еден од клучните енергетски центри во светот. Во исто време, сè поострата реторика укажува на ризикот од поширока регионална конфронтација, во која инфраструктурата за снабдување со нафта и гас би можела да стане примарна цел.