Отстранети 905 кубни метри отпад од диви депонии

Во текот на изминатата седмица, екипите на јавното претпријатие „Комунална хигиена“ спровеле активности за целосно расчистување и рачно миење на просторот под Камениот мост.

Паралелно со овие активности, биле отстранети вкупно 905 кубни метри мешан комунален, кабаст и градежен отпад од дивите депонии на територијата на сите скопски општини. Најголемо количество непрописно одложен отпад, односно 190 кубни метри, било расчистено во општината Ѓорче Петров.

Во рамките на редовните активности, претпријатието подигнало и транспортирало приближно 3.000 тони мешан комунален отпад од домаќинствата и правните субјекти во Скопје. Воедно, продолжила и замената на старите и дотраени контејнери со нови садови за одлагање отпад, при што досега се заменети вкупно 700 контејнери.

Екопатролата на ЈП „Комунална хигиена“ минатата недела изготвила 25 записници за физички и правни лица затечени при прекршување на Законот за јавна чистота. Најголем број записници, вкупно 10, биле врачени на територијата на општината Чаир.

Покрај теренските активности, претпријатието ги започнало и едукативните активности за учебната 2026/2027 година. Првите екоработилници биле реализирани во градинката „Снежана“ во општината Чаир, каде што учествувале 150 деца од двата објекта на установата.