Новинар на „Фокс њуз“: Трамп ми рече дека ќе ja дигне цела земја во воздух ако Иранците не го потпишат договорот

Американскиот претседател Доналд Трамп упати остро предупредување до Иран, велејќи дека ова е „последна шанса“ Техеран да се согласи на договор за неговата нуклеарна програма и се закани со сериозни последици доколку не се постигне договор.

Трамп го кажа ова во интервју за Фокс њуз, а неговите изјави ги пренесе дописникот Треј Јингст, кој, како што тврди тој, разговарал со него околу 20 минути. Според Јингст, Трамп ги повторил заканите за напад на иранската инфраструктура, вклучувајќи мостови и електрани, кои претходно ги објавил на социјалните мрежи.

Последно предупредување до Техеран
Во денешниот разговор, Трамп беше директен. „Ако не го потпишат тој договор, целата земја ќе летне во воздух“, изјави претседателот за Јингст на Фокс. Фокс њуз истакнува дека Трамп нагласил дека ова е последна шанса за Иран и ветил дека нема да ја повтори истата грешка како поранешниот претседател Обама.

„Ќе ги удриме посилно од кога било“
Трамп зборуваше и за воената подготвеност на Соединетите Американски Држави. „Ќе ги удриме посилно од која било друга земја досега, бидејќи не може да им се дозволи да имаат нуклеарно оружје“, изјави тој. Додаде дека САД имаат огромни количини муниција и го коментираше однесувањето на Иран со зборовите: „Како да не можат ништо да научат“.

И покрај острата реторика, дипломатските напори се чини дека продолжуваат. Трамп потврди дека специјалните пратеници Виткоф и Кушнер ќе патуваат во Исламабад, главниот град на Пакистан, оваа недела на разговори таму.

Новинарот Треј Јингст, кој разговараше со Трамп, известува од Тел Авив, каде што ги следи случувањата.

„Сите опции се на маса“
Амбасадорот на САД во Обединетите нации, Мајк Валц, рече дека САД би можеле „релативно лесно“ да ја уништат инфраструктурата на Иран.

„Сите опции се на маса. Можеме релативно лесно да ја отстраниме таа инфраструктура“, рече Валц во емисијата „This Week“ на ABC.

Тој додаде и дека нападите врз инфраструктурата, која има двојна, цивилна и воена намена, не претставуваат воено злосторство, туку дел од, како што рече, „скалата на ескалација“.