Историски медицински зафат во Македонија: Мајка донираше бубрег на своето дете со Алпортов синдром

Историски медицински зафат е направен во Македонија, каде за првпат е трансплантиран бубрег од мајка на дете со Алпортов синдром – ретко наследно заболување кое ги оштетува бубрезите и може да предизвика нивна целосна слабост.

Од Министерството за здравство информираат дека по деталните медицински анализи била потврдена компатибилноста меѓу мајката и детето, по што таа била одобрена како жив дарител. Со нејзината одлука, на детето му е овозможена нова можност за лекување.

Министерот за здравство Сашо Клековски го оцени зафатот како резултат на стручноста и координацијата на медицинските тимови, нагласувајќи дека трансплантацијата може значително да го промени животот на пациентите.

Покрај овој случај, на Универзитетската клиника за урологија неодамна биле извршени уште две трансплантации со бубрези од починат дарител, како и една од жив дарител.

Со последните три зафати, бројот на трансплантации на бубрег во земјава годинава се искачил на 15. За споредба, во текот на целата 2025 година биле направени 11 вакви трансплантации, соопштува Министерството за здравство.

Алпортовиот синдром е наследна генетска болест која постепено го оштетува бубрежното ткиво, а кај потешките форми може да доведе до откажување на бубрезите и потреба од дијализа. Од Министерството посочуваат дека случајот ја покажува важноста на прецизната дијагностика и деталната процена при подготовка на трансплантации кај пациенти со ретки заболувања.

Националната координаторка за трансплантација, проф. д-р Билјана Кузмановска, упати благодарност до семејството за довербата и согласноста случајот да биде споделен со јавноста, како и до медицинскиот персонал вклучен во сложената процедура.