Норвежаните го донесоа „вкусот на татковината“ во САД

Норвешката репрезентација уште еднаш покажа дека знае како да го привлече вниманието пред големите натпреварувања. По фотографирањата во викиншка облека и дресови од клубовите во кои ги направија првите фудбалски чекори, Скандинавците сега се најдоа во центарот на вниманието поради необичната организација на својот камп за Светското првенство.

За време на престојот во Соединетите Американски Држави, Норвежаните решија да понесат дел од својата татковина со себе. Во базата на националниот тим во Гринсборо, Северна Каролина, пристигнала огромна пратка со традиционални норвешки производи.

Според информациите, во кампот биле доставени повеќе од 300 килограми риба, 6.000 портокали и дури 116 килограми од познатото норвешко кафеаво сирење „Бруност“, кое важи за еден од националните симболи на земјата.

Целта на ваквиот потег е играчите да се чувствуваат што е можно попријатно за време на долгото и напорно натпреварување, но и да ја задржат врската со домашната атмосфера и навиките од секојдневниот живот.

Норвешка на овој Мундијал пристигнува со големи амбиции и генерација предводена од еден од најдобрите напаѓачи во светот, Ерлинг Халанд, како и со капитенот Мартин Одегард, кој веќе неколку сезони е лидер на средниот ред.

Скандинавците ќе настапуваат во Групата И, каде што ги очекуваат предизвици против Франција, Сенегал и Ирак.

Останува да се види дали „вкусот на домот“ ќе биде дополнителен адут за Норвежаните во обидот да приредат изненадување на најголемата фудбалска сцена.