НАЈАВА ЗА СОБИР ЗА МАКЕДОНСКО-РУСКО ПРИЈАТЕЛСТВО ПРЕДИЗВИКА РЕАКЦИЈА НА БРЕГАЛНИЧКАТА ЕПАРХИЈА: Владиката Иларион: Не дозволуваме провокативен собир во кругот на црквата во селото Блатец 

Провокација која нема да се дозволи да се одржи во кругот на храмот во изградба во виничкото село Блатец е најавата дека таму ќе има „собир и разговор околу македонско-руското пријателство пред руската православна црква“, реагира денеска брегалничкиот митрополит на МПЦ-ОА, Иларион. До реакцијата доаѓа откако сè уште непознати организатори, за задутре, покрај црковниот храм во изградба, најавија одржување на сенародниот собир на кој ќе се зборува и за православната поврзаност, за определба и правецот во кој се движи Македонија како држава. Брегалничката епархија веднаш се огради од најавите за еден ваков собир и го смета за чиста провокација, не го поддржува и им порача на верниците дека таа локација не е адекватно место за вакви собири.

Сè уште непознати организатори, деновиве, преку објава на телевизија Кочани, упатија повик до граѓаните да дојдат на утрешен собир закажан за во 18 часот.

– Се повикуваат граѓаните на Општина Виница и на Општина Кочани, нека повелат на сенароден собир и на разговор околу македонско-руското пријателство, православната поврзаност и иднината на Република Македонија со оглед на сегашната состојба, определба и правец во кој се движи народот и здравата Македонија. Собирот ќе се одржи пред руската православна црква во село Блатец, на ден 14. 06. 2026 година во 18 часот – се наведува во објавата.

Од телевизија Кочани ни изјавија дека еден граѓанин лично во нивни простории доставил ваква објава како комерцијален оглас и уредно платил за повеќекратно објавување.

Историјатот на храмот, кој почна да се гради пред неколку години и сè уште е во изградба, а е посветен на Светите Кирил и Методиј, покажува дека е поврзан со починатиот монах и игумен Методиј, кој дваесетина години дејствувал во рамките на Руската православна црква во Валаамскиот манастир кај Санкт Петербург. Тој потекнува од ова виничко село и своевремено, пред својата смрт во 2021 година, дал донација за изградба на храмот. Монахот Методиј, со световното име Венко Петров, беше познат и како голем обожавател на рускиот претседател Владимир Путин, а при една средба дури се обиде и да му ја бакне раката на рускиот претседател. Според сознанијата, посебно активен во изградбата на храмот е еден роднина на монахот Методиј, кој живее во Блатец. Кога беше поставен камен-темелникот, чинот на осветувањето го изврши македонскиот архиепископ охридски и македонски г. г. Стефан и брегалничкиот владика Иларион.

Во Брегалничката епархија, за весникот ВЕЧЕР изјавија дека собирот воопшто не им бил пријавен дека ќе се одржи, иако тоа е потребно. И МВР не добило пријава за одржување на собирот.

–Овој собир го сметаме за провокативен и нема да дозволиме тој да се одржи пред и во кругот на храмот. Како Црква и како Епархија, не го поддржуваме и не стоиме зад него. Таму и онака нема услови за тоа бидејќи не е завршен и со тоа не е безбеден. Но, не сакаме и да дозволиме собири со таква димензија. Дворот на црквата не е место за такви разговори. Ние како Црква не сакаме да заземаме никакви страни. Сакаме соработка со сите, но тоа не се прави на ваков начин – изјави надлежниот брегалнички митрополит, Иларион, за весникот ВЕЧЕР.

Тој додава дека се работи за имот кој сега ѝ припаѓа на МПЦ-ОА и дека, без нејзина согласност, таму не може да се прават недозволени дејства.

Епархискиот намесник отец Димитар Арсовски, во објавата на социјалните мрежи, наведе дека собирот „Не е под покровителство на Црквата, и е без знаење и благослов на нашиот надлежен епископ“.

–Со самото тоа се оградуваме од каква било поврзаност со истиот. Исто така, храмот каде што е закажан собирот е во изградба и не е адекватно место за вакви собири. Црквата го демантира и не го одобрува овој собир бидејќи е без нејзино знаење. Црквата е македонска и му припаѓа на народот Божји од Блатец и на сите луѓе, а е под управа на МПЦ-ОА Брегалничка епархија – се нагласува во објавата.

Познато е, веќе некое време во јавноста се зборува за одредени влијанија на Руската православна црква врз одредени достоинственици на МПЦ-ОА, односно, за постоење и на посебна струја која се залага за посебна блискот со црковната Москва. Во изминативе години се забележани и одредени спорни одлуки донесени од страна на МПЦ-ОА поврзани со ставовите на РПЦ и кои предизвикаа реакции во јавноста. (Б. Ѓ.)