Блискиот Исток повторно ги крева цените на нафтата

Цената на суровата нафта од типот „Брент“ денес се искачи над 113 долари за барел, приближувајќи се до четиригодишниот максимум од 116,72 долари, постигнат на 23 октомври.

Според „Trading Economics“, овој пораст се должи на зголемените геополитички тензии, кои поттикнаа загриженост за можни прекини во снабдувањето.

Цената на американската сурова нафта „West Texas Intermediate“ (WTI) се искачи на приближно 104 долари за барел – што е највисоко ниво од 15 септември, кога достигна четиримесечен врв од 105,83 долари.

Скокот на цените следи по извештаите дека висок американски воен командант го информирал претседателот Доналд Трамп за опциите за продолжување на воените напади врз Иран, додека самиот Трамп во повеќе наврати се закани со дополнителни воени дејствија против Техеран.

Во меѓувреме, Иран навести дека нема да го омекне својот став во однос на условите за завршување на конфликтот, иако потврди дека примил писмо од американскиот потпретседател Џ. Д. Венс, чија цел е обновување на мировните преговори.

Дополнителни тензии се појавија околу Ормускиот теснец по два одделни инциденти во кои беа вклучени нафтени танкери, што предизвика стравувања дека една од најважните поморски рути во светот за транспорт на нафта би можела да биде загрозена.

Истовремено, украинските сили извршија напад врз руска рафинерија во регионот Самара, додека Москва во текот на ноќта започна нов напад врз Украина. Овие настани дополнително ја зголемија загриженоста за безбедноста на глобалното снабдување со енергенси, при што цената на суровата нафта во текот на октомври порасна за приближно 15 отсто.

Инвеститорите внимателно ги следат случувањата на Блискиот Исток и во регионот на Црното Море, бидејќи секоја можна ескалација на конфликтот би можела да доведе до дополнителни прекини во производството и транспортот на нафта, како и до натамошен раст на цените на глобалниот пазар.