Стејт департментот одобри важно барање на Володимир Зеленски

Стејт департментот на САД во петокот објави дека ја одобрил продажбата на 500 пресретнувачки ракети „Патриот ПАЦ-3“ (Patriot PAC-3) на Украина, со проценета вредност од 2,1 милијарда долари.

Украина ќе ја финансира набавката на овие одбранбени ракети преку придонеси од Канада, Германија и Норвешка – кои се реализираат преку американската програма „Џампстарт“ (JUMPSTART) – како и преку национални средства поддржани од заем на Европската унија за Украина, соопшти Стејт департментот.

Испораката на ракетите беше одложена, што дополнително ги зголеми тензиите меѓу Украина и Соединетите Држави. Ова се случи откако американскиот претседател Доналд Трамп објави договор со Русија во врска со дизелот и го критикуваше украинскиот претседател Володимир Зеленски поради одбивањето на Украина да ги запре нападите врз руските рафинерии за нафта, пренесува Ројтерс.

Претходно оваа недела, Зеленски изјави дека Украина речиси еден месец чека одобрение од САД за испорака на овие клучни ракети, токму во време кога Русија ги засилува нападите врз енергетската и цивилната инфраструктура.

Украинскиот претседател во повеќе наврати ги повика САД да ги забрзаат испораките пред почетокот на зимата. Овие ракети ги купуваат сојузници од НАТО преку програма позната како PURL, а ги испорачуваат Соединетите Држави.

Главен изведувач за оваа продажба е компанијата „Локхид Мартин“ (Lockheed Martin).

Во меѓувреме, САД испорачуваат големи количества оружје на своите сојузници, додека истовремено користат муниција во сопствените воени операции во Иран. Ова предизвика загриженост во однос на залихите на клучни системи за противвоздушна одбрана и прецизно наведувана муниција.

Во јули, Армијата на САД склучи договор со „Локхид Мартин“ во вредност до 58,6 милијарди долари за производство на пресретнувачки ракети „Патриот“.

Компанијата претходно изјави дека овој договор ќе ѝ овозможи до крајот на 2030 година да ги утростручи производните капацитети за ракетите „ПАЦ-3 МСЕ“ (PAC-3 MSE). Плановите вклучуваат и зголемување на бројот на вработени за 50 отсто во погонот во Камден, Арканзас – од 1.200 на приближно 1.850 вработени.

„Локхид“ претходно објави дека годишното производство на пресретнувачки ракети „Патриот ПАЦ-3“ ќе достигне 2.000 единици. Сепак, преговарачите од Пентагон вршат притисок врз производителите значително да го забрзаат производството, а претходно оваа година беа постигнати и прелиминарни договори за проширување на производните капацитети.