Иран го враќа интернетот: Но, не за сите

Советот за национална безбедност на Иран одобри привремен план за да им овозможи на компаниите пристап до глобалниот интернет со помалку ограничувања, изјави денес портпарол на владата за иранските медиуми. Одлуката доаѓа по неколку недели прекини на интернетот што ги наметнаа властите од почетокот на војната со САД и Израел, пренесува Ројтерс.

Според податоците од NetBlocks, организација која ја следи и анализира состојбата на интернетот низ целиот свет, повеќето ирански граѓани немале пристап до глобалната мрежа во последните 60 дена, додека само мал број корисници можеле да користат скапи и напредни VPN услуги за да ги заобиколат ограничувањата.

Портпаролката на иранската влада, Фатемех Мохаџерани, изјави дека советот ја одобрил програмата „Интернет Про“ за зачувување на бизнисот во услови на криза, но не прецизираше кога е воведена мерката.

Властите прво воведоа целосно исклучување на интернетот на 8 јануари за време на антивладините протести, по што пристапот постепено беше нормализиран во февруари, само за повторно да биде ограничен по почетокот на американските и израелските напади врз Иран на 28 февруари.

Под нормални околности, пристапот до интернет во Иран е ограничен со години поради цензура на бројни веб-страници, додека властите сè повеќе се потпираат на таканаречениот интранет систем за внатрешни дигитални услуги, вклучително и образование.