Центар го одбележа роденденот на Горан Стефановски

Со богата уметничка програма, Општина Центар го одбележа роденденот на големиот македонски драмски автор, Горан Стефановски, враќајќи го за миг неговиот дух и присуство во Дебар Маало.

Настанот се одржа кај спомен-клупата посветена на бардот, а домаќин беше неговиот син, Игор Стефановски, кој заедно со пријателите и блиските сподели спомени, сеќавања и анегдоти од животот на познатиот дебармаалец. На присутните им се обрати и градоначалникот на Општина Центар, Горан Герасимовски.

 – Горан Стефановски е дел од нашето секојдневие, од јазикот, од мислата и од начинот на кој гледаме на светот. Со ваквите настани му оддаваме почит и го чуваме неговиот збор – истакна Герасимовски.

Во рамки на програмата, хорот „Мирче Ацев“ изведе неколку песни, омилени на Стефановски, настап имаше и џез-формацијата „Трицикл“, а беа изведени и актерски монолози од неговите дела.

Публиката имаше можност да ги погледне и портретите на Горан Стефановски, дело на Ненад Рафајловски, додека музичкиот сет на диџеј Шурбе ја заокружи вечерта.

Општина Центар го чествува Горан Стефановски преку низа културни настани и активности посветени на неговиот лик и дело.