Бесплатни униформи за сите ученици од училиштата во Центар 

Учениците од прво до деветто одделение во училиштата на територијата на Општина Центар и годинава ќе добијат бесплатни униформи.

Секој ученик ќе добие комплет од пет памучни парчиња: две маици со јака, две маици со долги ракави со јака и еден дуксер со патент.

Општина Центар ја воведе оваа мерка минатата година, со цел да се намалат социјалните разлики меѓу учениците и да се создаде училишна средина во која секое дете ќе се чувствува еднакво и прифатено.

Градоначалникот на Општина Центар, Горан Герасимовски, истакна дека обезбедувањето бесплатни униформи е дел од заложбите на Општината за еднакви услови за сите деца.

– Училиштето треба да биде место каде што ќе се разликуваат децата според знаењето, трудот и успехот, а не по тоа кој што носи и колку може да си дозволат неговите родители. Токму затоа минатата година ја воведовме оваа мерка, а продолжуваме и оваа година. Со бесплатните униформи, сакаме да ги намалиме социјалните разлики, да спречиме тие да бидат причина за поделби или булинг и да го зајакнеме кај децата чувството дека сите подеднакво му припаѓаат на своето училиште – порача Герасимовски.

Општина Центар ќе продолжи со оваа мерка и во наредните учебни години, при што ќе се обезбедуваат бесплатни униформи и за новите генерации ученици.

Покрај бесплатните униформи, Општина Центар и оваа година ќе обезбеди бесплатни ранци за сите првачиња запишани во осумте општински основни училишта, како дополнителна поддршка за семејствата и убав почеток на нивното прво училишно поглавје.

– Со овие мерки, Општина Центар продолжува да инвестира во образование во кое секое дете има еднаква можност, еднаков третман и услови непречено да им се посвети на учењето и на својот развој – наведуваат од локалната самоуправа.