Азбестните водоводни цевки се менуваат со побезбедни

Општина Струга започна со една од најголемите комунални интервенции во последните години, со инвестиција од околу 90 милиони денари за изградба и реконструкција на современ водоводен систем. Градежните активности веќе се одвиваат на терен. Се врши замена на дотраените азбестноцементни цевки со нови, посовремени и здравствено побезбедни материјали. Со оваа интервенција се очекува да се подобри стабилноста на водоснабдувањето и значително да се намалат загубите во водоводната мрежа.

Во рамките на првата фаза од проектот е предвидена реконструкција на околу шест километри водоводна линија. Според надлежните, досега е реализиран повеќе од половина од планираниот обем на работа, а завршувањето на оваа фаза се очекува пред почетокот на летната сезона, кога, традиционално, се зголемува потрошувачката на вода поради туристичката активност и поголемиот број посетители.

Проектот има цел да реши два значајни предизвици: замена на застарената инфраструктура што носи потенцијални здравствени ризици и намалување на техничките загуби во системот, кои ја прават мрежата поскапа и помалку ефикасна во периодите на зголемена потрошувачка.

Од Општината нагласуваат дека стабилниот водоводен систем претставува клучна инфраструктура за град што се потпира на домаќинствата, услужниот сектор и на туризмот.

Паралелно со активностите на водоводната мрежа, се следи и динамиката на градежните работи за колекторскиот систем на делницата Радожда – Елен Камен. Овој проект е дел од пошироките напори за заштита на Охридското Езеро и за намалување на ризиците од загадување.

Во тој контекст, надлежните информираат дека веќе постапуваат институциите и во врска со неодамнешните проблеми со заматување на водата и пријавените нелегални активности во близина на извориштата, со порака дека мора да има одговорност за ваквите појави.