Алармантно е во Мостар, се евакуира населението/ВИДЕО

Ситуацијата на депонијата Уборак во близина на Мостар се влоши, со повторно разгорување на пожарот, кој овој пат ги загрозува домовите на граѓаните. Градоначалникот на Мостар, Марио Кордиќ, изјави дека е наредена евакуација на населението.

Кордиќ изјави дека пожарот бил подметнат и дека биле запалени гуми, пишува N1BiH.

„Тука има и елементи на тероризам бидејќи е прогласена вонредна состојба, а некој го подметнал пожарот“, рече Кордиќ.

Тој истакна дека куќите биле загрозени, а дополнителна опасност е тоа што во близина имало резервоар за гориво.

Тој ги повика граѓаните да „не наседнуваат на политички манипулации“ и да „се обединат за да ги идентификуваат сторителите“.

„Очигледно, некој шетал некаде и барал каде да го создаде следниот проблем. Одреден број луѓе се движеле низ депонијата цела ноќ“, потенцира Кордиќ.

Евакуираното население ќе биде сместено во прифатниот центар во Салаковац.

Пожарникарите се на лице место, а ситуацијата е дополнително комплицирана од предвидениот северен ветер.

Кордиќ рече дека Штабот за цивилна заштита, во услови на вонредна состојба, има овластување да издава наредби што мора да се спроведат. „Вонредна состојба не е прогласена затоа што е некаков вид форма, туку затоа што здравјето на жителите на Мостар е загрозено. Во тој момент, Штабот го презема управувањето. Ако наредбата е претовар на отпад на одредена локација, тогаш мора да се работи на таа локација“, рече тој.

Тој додаде дека, доколку е потребно, полицијата ќе мора да обезбеди спроведување на одлуките на Штабот. „Во моментот кога некој ќе блокира наредба од Штабот за цивилна заштита, Министерството за внатрешни работи помага во нејзиното деблокирање. Сè друго е анархија и самоволие“, рече Кордиќ, според порталот Hercegovina.info.

Зборувајќи за квалитетот на воздухот и можните здравствени последици, Кордиќ рече дека податоците од мерните станици редовно се следат и дека во моментов нема потреба за паника. „Испративме информации до здравствените центри и телефонски броеви на кои можат да се јават луѓето што имаат тешкотии“, рече тој.