Зеленски најави „одговор“ по жестокиот руски напад врз Киев

Претседателот на Украина Володимир Зеленски изјави во четврток попладне дека ѝм дал наредба на украинската војска и на сигурносните служби да подготват „можен формат на одговор“ по смртоносниот руски ракетен напад со дронови на Киев, во кој загинаа најмалку осум лица, додека 44 се повреднени, пренесе „Киев индепендент“.

Во текот на ноќта главниот град на Украина беше погоден со десетина ракети и стотина дронови, а во нападот е делумно уништена голема станбена зграда. Според податоците на градските власти, меѓу загинатите е и едно 13-годишно дете.

Спасувачките екипи продолжија во текот на денот со потрагата и со расчистување на урнатитете во станбената населба на источниот дел од градот, каде што досега се спасени 11 лица, а 17 други уште се водат за исчезнати, соопшти Државната служба за вонредни ситуации.

Украинскиот министер за надворешни работи Андриј Сибиха изјави дека побарал состанок на Советот за безбедност на ООН по нападот за да се разгледаат „убиствата на украински цивили и нападите врз хуманитарниот персонал“.

Според украинските воздухопловни сили, Русија лансирала 56 ракети од различни видови преку ноќ, вклучувајќи балистички ракети „Искандер“ и аеробалистички ракети „Кинжал“, како и 675 камикази дронови.

Украинската воздушна одбрана соборила или попречила 29 крстосувачки ракети „Х-101“, 12 ракети „Искандер“ или „С-400“ и 652 дронови пред да ги погодат своите цели.

Повикувајќи се на прелиминарните извештаи, Зеленски рече дека ракетата „Х-101“ што ја погодила зградата во Киев била произведена во вториот квартал од оваа година, што, според него, покажува дека Русија сè уште успева да набави компоненти и опрема за производство на ракети и покрај меѓународните санкции.

„Подготвуваме чекори што можат да го зајакнат нашиот заеднички одговор.“ Санкциите мора да бидат поболни за Русија, рече Зеленски на Телеграм, повикувајќи ги западните сојузници да ја спречат Москва да ги заобиколи санкциите.

Тој додаде дека стапката на пресретнување на дронови за време на последните напади била 94 проценти, додека на ракетите само седум проценти, предупредувајќи на сериозен недостиг на антибалистичка ракетна одбрана.

– Ова е намерна терористичка тактика од страна на Русија, која со недели акумулира беспилотни летала и ракети со цел да изврши напад од големи размери и максимално да ја оптовари нашата воздушна одбрана, – рече украинскиот претседател.

Руското Министерство за одбрана соопшти дека ова е „масовен удар“ како одговор на она што тие го тврдат како украински напади врз цивилни објекти во Русија.

Воената разузнавачка служба ХУР на Украина предупреди дека Русија може да продолжи со нападите со нови бранови крстосувачки и балистички ракети лансирани од воздух и море.