Загреб е во сообраќаен колапс трет ден по ред – цените на такси услугите вртоглаво пораснаа

Главниот град на Хрватска, Загреб, и денеска е парализиран поради штрајкот на работниците во јавниот превоз. За разлика од вчера, од утринава сообраќаат три линии: две трамвајски и една автобуска.

На автобуската линија 228 сообраќаат четири автобуси, превезувајќи патници од стадионот „Максимир“ до Клиничкиот болнички центар „Ребро“ (KBC Rebro). Трамвајот со број 12 утринава излезе од депото, а набрзо потоа и трамвајот со број 7.

Цените на такси-услугите вртоглаво пораснаа во средата. Вожњите чинат неколкукратно повеќе од вообичаеното, а според извори за N1 Загреб, наоѓањето слободно такси станало невозможна мисија.

Владимир Јозиќ, главниот синдикален претставник во ZET (Загребски електричен трамвај) за Н1 вели дека вчерашната судска одлука е позитивен знак и напоменува дека денес веќе испратиле писмо до работодавачот со предлог за арбитража.

„Подготвени сме веднаш да седнеме со градоначалникот и да ги слушнеме предлозите; сите опции се на маса, но да ја почекаме судската одлука. Верувам дека таа ќе биде во наша корист, но и да не биде, остануваме подготвени за разговор со градоначалникот“, изјави Јозиќ.

На прашањето дали работниците веднаш би се вратиле на работа доколку судската одлука биде неповолна за нив, Јозиќ одговори дека постои рок од пет дена за поднесување жалба.

„Градоначалникот е тој што носи одлуки, ако тој издаде инструкции до Управниот одбор, тогаш ќе разговараме“, рече Јозиќ, додавајќи дека нема да ги изнесуваат своите барања преку медиумите. Ги разбираме граѓаните и им се извинуваме на сите што ни се јавуваат. Тие можат да се јават и во градската управа. И кај нас владее напнатост, а денешната одлука многу ќе открие“, вели тој.

Во врска со возачите кои не стапија во штрајк, Јозиќ напоменува дека двајцата колеги што денес возат сакале да бидат на трасата уште од првиот ден и дека нема други заинтересирани за работа. Претседателот на Управниот одбор на ZET, Марко Богдановиќ, за N1 изјави дека очекува одлука во корист на ZET и го смета штрајкот за незаконски.

„Доколку одлуката биде во наша корист – а постапката за арбитража е веќе во тек – тоа ќе биде клучниот фактор што ќе одреди во која мера можеме да обезбедиме транспортни услуги за корисниците“, вели Богдановиќ.