Франција официјално потврди дека нејзини војници се наоѓаат на територијата на Украина, но тврди дека тие не учествуваат во борбите против руските сили. Нивната задача е обука на украинските војници, како и одржување и поправка на воената опрема, а според Париз, се распоредени далеку од фронтовската линија.
Москва, сепак, ваквата мисија ја смета за директно учество во војната и предупредува дека француските војници може да станат легитимни цели на руската армија.
Француската функционерка Алис Руфо потврди дека припадници на француските вооружени сили се наоѓаат во Украина, со што Париз официјално го призна присуството на свој воен персонал во земјата, која речиси пет години се брани од руската инвазија.
Како што пренесува француски „Ле Фигаро“, Руфо објаснила дека станува збор за многу ограничена и повремена мисија, чија цел е обезбедување техничка и инструкторска помош за украинските сили. Таа нагласила дека француските војници не учествуваат во борбени операции.
Според нејзините зборови, француските воени лица се наоѓаат на голема оддалеченост од првата линија на фронтот, а нивните активности се ограничени на обука на украинскиот воен персонал и одржување и поправка на воената опрема.
Руфо ги отфрли оценките дека ваквото присуство претставува директно француско воено вклучување во конфликтот.
Таа објаснила и дека поради ограничениот карактер на мисијата, францускиот парламент не бил претходно информиран за распоредувањето на војниците.
Француските војници се во Украина уште од летото
Француското јавно радио „РФИ“ на 16 ноември објави дека француски војници се наоѓаат во Украина најмалку од летото 2026 година.
Според истражувањето на француските новинари, станува збор за мисија што се спроведувала без јавно соопштување. Радиото наведува дека француските војници не учествувале во борбите, туку биле ангажирани во обука на украинските сили и поправка на воената опрема.
Москва: Тоа е директно учество во војната
Русија остро реагираше на информациите за француската воена мисија во Украина. Рускиот министер за надворешни работи Сергеј Лавров оцени дека ваквото присуство повеќе не може да се смета само за поддршка на Украина.
„Тоа веќе не е помош за Украина, туку директно учество во војната“, порача Лавров.
Уште подиректно предупредување упати портпаролката на руското Министерство за надворешни работи, Марија Захарова.
„Париз мора да разбере дека тие војници ќе станат легитимни цели на руската армија“, изјави Захарова.












