За петмина искусни алпинисти кои спасуваа планинари, немаше спас на „покривот на Европа“- БиХ обвиена во тага по трагедијата на врвот Елбрус на Кавказ, во Русија

Планинарот Харис Адиловиќ, еден од двајцата преживеани планинари, раскажа дека трагедијата е резултат на погрешна временска прогноза, а не на недостаток на подготовка на групата. Тој вели дека тешкотиите се појавиле уште од самиот почеток на искачувањето. Групата немала водич, а во почетната фаза, еден од учесниците почнал сериозно да се замрзнува, што го принудило водечкиот тим да се врати. Дино Ахметовиќ од ГСС „Зеница“ објасни дека откако временските услови почнале нагло да се менуваат на 5.100 метри, еден член на експедицијата се упатил кон спасувачката екипа во базата и успеал да стигне до неа, но времето се сменило екстремно брзо и ветровите дувале со брзина од 70 до 100 километри на час

Босна и Херцеговина е обвиена во тага по невидената алпинистичка трагедија на врвот Елбрус во Русија. Пет од седум члена на заедничката експедиција на Службата за спасување на планината „Зеница“ и Планинарското друштво „Ведро“, сите искусни, квалификувани планинари со многу искачувања, загинаа во ненадејна, силна бура на „покривот на Европа“, како што го нарекуваат Кавказ.

Планинарот Харис Адиловиќ, еден од преживеаните членови на експедицијата, во изјава за руските медиуми, разјасни што тргнало наопаку. Зборувајќи за руска „Известија“, Адиловиќ рече дека трагедијата во која петмина алпинисти ги загубија животите е резултат на погрешна временска прогноза, а не на недостаток на подготовка на групата. Тој раскажа дека тешкотиите се појавиле уште од самиот почеток на искачувањето. Групата немала водич, а во почетната фаза еден од учесниците почнал сериозно да се замрзнува, што го принудило водечкиот тим да се врати.

– Другиот тим продолжил да се искачува, но по околу 100-150 метри, и ние решивме да се откажеме од искачувањето. Кога ги обезбедивме јажињата на дел од маршрутата и се искачивме повисоко, видовме дека ситуацијата на врвот е уште полоша. Решивме да се вратиме. Значи, не стануваше збор за недостаток на подготовка. Мислам дека главната причина беше неточната временска прогноза, рече Адиловиќ, пренесува „Известија“.

Дино Ахметовиќ од ГСС „Зеница“ објасни за „Нова“ дека откако временските услови почнале нагло да се менуваат на 5.100 метри, еден член на експедицијата се упатил кон спасувачката екипа во базата и успеал да стигне до неа. За жал, времето се сменило екстремно брзо. Ветровите дувале со брзина од 70 до 100 километри на час, што е промена во рок од околу 20, 25 минути.

Во трагедијата на Елбрус, животите ги загубија докторката Мелиха Чаушевиќ, потоа Алма Окановиќ, Денис Окановиќ, Алмир Кривдиќ и Нермин Талам. Освен Адиловиќ, од членовите од БиХ експедицијата ја преживеа и Кемал Видимлиќ. Тие се згрижени, додека поради лошите временски услови, спасувачите во текот на вчерашниот ден не успеаја да ги излечат телата на сите жртви. Телата на двајцата алпинисти се пронајдени на приближно 5.350 метри надморска височина и транспортирани од планината. Руските истражители подоцна потврдија дека се пронајдени и телата на другите тројца членови на групата, но поради лошите временски услови, тие сè уште не се спуштени во долината.

Елбрус, кој е дел од седумте врвови, највисоките во секој континент, зема голем број животи секоја година, иако неговото искачување не е меѓу технички најсложените планинарски потфати. Освен непредвидливите временски промени, најголемите закани се големата надморска височина, исцрпеноста и погрешните процени на алпинистите. Алпинистот и патеписец Дамир Шантек, кој се искачи на Елбрус пред шест години, ја опиша планината како смртоносна.

– На такви височини, временските услови се честопати многу неповолни, непријатни, а промените се значителни. Значи, сега имате, да речеме, убаво, сончево време, за два часа имате силна бура каде што имате грмотевици, молњи, силен ветер кој носи мраз и снег во лицето, не можете да видите два метра пред вас и лесно е да се изгубите на такви места, рече тој, додавајќи дека по правило, искачувањето трае помеѓу десет и дванаесет часа, а иако на маршрутата нема сложени технички делови, алпинистите мора да се движат континуирано за да ја одржат телесната температура и навреме да реагираат на евентуални промени на времето.