Неочекуван миротворец: Путин и Киев сложни во пофалбите за Меланија Трамп

Москва и Киев соопштија дека е завршено разминирањето на патиштата до градот Олешки, во јужна Украина, кој е под руска контрола. Со тоа се создадени услови за почеток на хуманитарна операција и евакуација на цивилното население.

Хуманитарниот конвој е подготвен да тргне кон градската болница, а локалното примирје треба да овозможи безбедно доставување помош и заминување на жителите кои сакаат да го напуштат градот. По евакуацијата е планирана и поделба на пакети со хуманитарна помош.

Жителите на Олешки со месеци се соочуваат со недостиг од храна, лекови и основни намирници. Градот е под руска контрола од почетокот на инвазијата во февруари 2022 година и се наоѓа наспроти Херсон, од другата страна на реката Днепар.

И руските и украинските претставници ја пофалија улогата на првата дама на САД, Меланија Трамп, во постигнувањето на локалното примирје. Рускиот претседател Владимир Путин изјави дека испораката на хуманитарна помош треба да започне во четврток и петок.

Сепак, договорот се однесува исклучиво на Олешки и околината и не претставува поширок прекин на огнот. Новите руски напади врз украинските градови, меѓу кои и врз железничката станица во Днепар, каде што според доставениот извештај загинале 14 лица, ги намалија надежите за поширока деескалација на конфликтот.

Во хуманитарната мисија, според најавите, ќе учествуваат и четворица новинари на американската телевизиска мрежа Newsmax.