Во невремето во Загреб повредени се неколку лица, некои потешко!

Неколку лица се повредени во невремето што го погоди подрачјето на Загреб, каде што силните ветрови предизвикуваат големи проблеми, а досега се повикани повеќе од 300 пожарникари, главно поради паднати дрвја и откорнати покриви, соопштија властите утрово.

Градоначалникот на Загреб, Томислав Томашевиќ, изјави дека неколку лица се полесно повредени, а во Загребскиот округ едно лице е тешко повредено, но не е во животно-загрозувачка состојба.

Тој ги повика граѓаните да не излегуваат надвор освен ако не мораат, главно поради ризикот од паѓање гранки од дрвја или предмети што ги носи ветерот. Според него, налети на ветер до 120 километри на час се измерени во Загреб синоќа и утрово. Досега се пријавени штети на околу 150 возила, а првичните проценки покажуваат дека се оштетени повеќе од 50 покриви на згради.

Меѓу другото, оштетен е покривот на кошаркарскиот центар „Дражен Петровиќ“, како и дел од настрешницата над одделот за итни случаи на Клиничкиот болнички центар во Загреб, но нема повредени.

Наставата е откажана во основните и средните училишта во Загреб и Загрепскиот округ.

Службата за цивилна заштита објави дека бурата го зафатила поголемиот дел од Хрватска, најмногу од областа на Загреб и Загребската жупанија.

Според нивните информации, едно дете е тешко повредено во населбата Шестак Брдо, во општина Покупско, како и едно лице во Загреб.

Државниот противпожарен оперативен центар 193 утрово објави дека низ цела Хрватска се регистрирани околу 950 интервенции, од кои околу 560 само во Загреб и Загребската жупанија.

Апокалиптични сцени од Загреб: Градот под вода, ветер од 120 км. на час корнeше покриви, снежно невреме во некои делови/ВИДЕО

Бурата предизвикува големи проблеми во сообраќајот во главниот град, главно поради паѓање дрвја и оштетување на трамвајските линии.

Државниот хидрометеоролошки завод објави дека црвеното предупредување за опасни временски услови е сè уште на сила за регионите Загреб, Риека и Госпиќ.

Се очекува времето постепено да се смири во текот на попладневните часови, иако ветерот сè уште ќе биде силен со врнежи.

Хрватскиот автоклуб предупреди дека силните ветрови предизвикуваат проблеми низ целата земја. Поради снегот и зимските услови за возење во Горски Котар и Лика, има ограничувања во сообраќајот, главно за камиони со приколки и трактори, а некои државни патишта се затворени за секаков сообраќај.