Лукашенко му подари пушка на Ким Џонг Ун: „Да ви се најде ако дојдат непријатели“

Белорускиот претседател Александар Лукашенко му подари пушка на севернокорејскиот лидер Ким Џонг Ун откако потпишаа договор за пријателство во Пјонгјанг.

Двајцата лидери, клучни сојузници на Русија, се согласија да соработуваат потесно и да се спротивстават на притисокот од Западот, објавија севернокорејските медиуми.

Предавајќи му автоматска пушка на севернокорејскиот лидер, Лукашенко се пошегува: „За секој случај ако се појават непријатели“, покажува видео објавено од белоруските државни медиуми.

За возврат, Ким му подари на Лукашенко меч и вазна со портрет на белорускиот лидер.

„Како некој што видел сè на овој свет и како пријател, можам да ви кажам дека вашата земја има одлична иднина со толку вредни и дисциплинирани луѓе“, му рекол Лукашенко на Ким, наведува белоруската новинска агенција Белта. Во време кога „моќните сили отворено ги кршат и ги игнорираат нормите на меѓународното право“, земјите мора да соработуваат за да „го заштитат сопствениот суверенитет и да ја подобрат благосостојбата на нашите граѓани“, додаде белорускиот претседател.

Лукашенко го нарече договорот за пријателство меѓу двете земји суштински, а Ким додаде дека тој „понатамошно ќе го гарантира стабилниот развој на билатералните односи“, објави Белта.

Двајцата лидери, исто така, се согласија да соработуваат во областите што се движат од земјоделството до информациите и јавното здравство, објави KCNA.