Уживајте во „Крвавата месечина“, глетка што нема да се повтори до 2028 година: На небото ќе се случи целосно затемнување на Месечината

Вечерва, 3 март, на небото ќе се случи целосно затемнување на Месечината, познато и како „крвава месечина“.

За време на овој феномен, Месечината добива темноцрвена или портокалова нијанса бидејќи Земјата привремено блокира дел од сончевата светлина што Месечината нормално ја рефлектира. Ова е исто така последното целосно затемнување до 2028 година, пишува N1 Сараево.

Зошто Месечината добива црвена боја?

Тотално затемнување на Месечината може да се случи само за време на полна месечина, кога Земјата се порамнува точно помеѓу Сонцето и Месечината. Ефектот на „крвава месечина“ се јавува кога целосната сенка на Земјата, или умбра, целосно ја покрива Месечината.

Сепак, дел од светлината на Сонцето поминува низ атмосферата на Земјата. Потоа, пократките бранови должини, како што се сината светлина, се расфрлаат, додека подолгите – црвената и портокаловата – стигнуваат до Месечината и ја осветлуваат нејзината површина. Колку повеќе прашина и честички има во атмосферата, толку е поинтензивна црвената нијанса.

Каде ќе биде видлив?

Овој астрономски феномен нема да биде видлив од Европа и Африка. Најдобри услови за гледање ќе бидат за жителите на Северна и Јужна Америка, делови од Источна Азија, регионот на Пацификот и Австралија. Фазата на целосно затемнување ќе трае малку помалку од еден час, додека црвеникавиот сјај ќе трае уште подолго.

Кога е следната можност?

Иако ќе мора да почекаме уште едно целосно затемнување, делумните лунарни затемнувања се случуваат почесто. Тие се случуваат кога Месечината е полна, но Земјата не е целосно порамнета помеѓу неа и Сонцето. Следното делумно затемнување се очекува на крајот на август оваа година и, за разлика од вечерва, ќе биде видливо и од Европа. Не се потребни посебни инструменти за да се набљудува – сè што треба да направите е да излезете надвор и да го погледнете ноќното небо.