„Тур де Галичица 2026“ на Липова Ливада

Националниот парк „Галичица“ на 21 јуни 2026 година (недела) ги кани заинтересираните да поминат незаборавен ден исполнет во природа, со рекреација и со автентичните вкусови од Преспа и од Охрид. Станува збор за настанот „Тур де Галичица 2026“, кој ќе се одржи на Липова Ливада, во рамките на НП „Галичица“.

– Посетителите ќе имаат можност да уживаат и во саем на локални производи, каде што ќе бидат претставени традиционални и домашни производи од регионот: мед, сирење, овошје, чаеви, ракотворби и многу други локални специјалитети. Воедно, предвидена е велосипедска тура низ прекрасните предели на Галичица. Доживејте ја уникатната природа помеѓу Охридското и Преспанското Езеро. Поминете пријатни моменти со семејството и со пријателите – повикуваат од НП „Галичица“.