Поранешниот шампион на Ферари ја загуби битката вредна 1,4 милиони фунти

Поранешниот шампион во Формула 1, Џоди Шектер, доживеа тежок пораз надвор од тркачките патеки, откако ја загуби правната битка со британската даночна управа за спор вреден околу 1,4 милиони фунти.

Јужноафриканецот, кој во 1979 година ја освои светската титула во Формула 1 со Ферари, се обиде да добие даночно олеснување врз основа на повеќемилионските загуби на својот земјоделски бизнис „Лејверстоук парк продјус ЛЛП“, но судот ја одби неговата жалба.

По завршувањето на кариерата, Шектер се пресели во Велика Британија и инвестираше речиси 55 милиони фунти сопствени средства во имотот „Лејверстоук парк“ во Хемпшир. Неговата цел беше да изгради голем центар за органско и биодинамичко земјоделство, со производство на храна и одгледување добиток.

Проблемите се појавија кога бизнисот почна да бележи значителни загуби во текот на неколку години. Шектер сакаше да ги искористи тие загуби за намалување на даночните обврски што произлегуваа од неговите други приходи и капитални добивки.

Сепак, британските даночни правила бараат бизнисот да функционира на комерцијална основа и да има реални изгледи за остварување профит. Токму тоа беше клучната точка во спорот.

Судот утврди дека земјоделскиот проект не ги исполнувал сите законски услови за бараното даночно олеснување. Особено внимание привлекол фактот што вредниот бренд „лејверстоук парк“ бил ставен бесплатно на располагање на друг деловен субјект, што не било во согласност со очекуваното комерцијално работење.

И покрај тоа, судиите не заклучиле дека Шектер го создал бизнисот само за да избегне плаќање данок. Напротив, било прифатено дека тој навистина сакал да изгради успешен бизнис со органска храна. Но, добрите намери не биле доволни за да се исполнат законските критериуми, па одлуката на даночните власти останала на сила.

Дополнителен удар за Шектер е и повлекувањето од дел од земјоделските активности. Неговиот проект за одгледување биволи бил затворен во 2024 година поради зголемените трошоци, намаленото производство на млеко и потребата од нови инвестиции.

Имотот „Лејверстоук парк естејт“ претходно бил понуден на продажба за дури 58 милиони фунти. Така, повеќе од четири децении по освојувањето на светската титула со Ферари, Шектер повторно се најде во центарот на вниманието, но овој пат поради скапата правна битка што заврши во негова штета.