Светски шампион ќе скапе во затвор поради сексуално злоупотребување деца

Поранешниот светски шампион во снукер, Греам Дот (49), е осуден на седум години затвор за сексуално злоупотребување деца. Шкотланѓанецот во август беше прогласен за виновен по две точки од обвинението за непристојни и недолични дејства. Делата биле извршени во периодот од 1993 до 2010 година, а случајот се однесува на две жртви – девојче и момче. Тој беше прогласен за виновен според шкотскиот закон за дела извршени пред стапувањето во сила на подоцнежните законски измени.

Додека му беше изрекувана пресудата во Високиот суд во Единбург, Дот не покажуваше емоции, иако во еден момент постојано ја тресеше главата во неверување. Судијата Лорд Хароуер оцени дека неговото однесување ги имало „класичните белези на демнење и на подготвување на жртвата за сексуално злоупотребување“. Според судот, Дот ги наградувал децата со разни задоволства и го претставувал злоупотребувањето како дел од игра.

Во текот на судењето беше утврдено дека во 90-тите години тој сексуално злоупотребил девојче на училишна возраст, додека другото дело се однесува на момче што имало околу осум години.

Судијата истакна дека постапките на Дот им одзеле на жртвите „значаен дел од нивното детство“, оставајќи зад себе страв, срам и гнев.

Дот ја освои светската титула во снукер во 2006 година, но неговата спортска кариера сега е целосно засенета од сериозниот кривичен случај. По изрекувањето на пресудата, тој останува во притвор и следните седум години ќе ги помине во затвор.