Сообраќајна рампа во Ормуз: Ниту еден танкер не поминал низ теснецот

Ниту еден танкер не поминал низ Ормутскиот теснец на 19 април, според податоците од веб-страницата „Marine Tracker“, откако Иран повторно го затвори стратешкиот воден пат „поради прекршувања на прекинот на огнот“.

Според „Marine Tracker“, неделата била еден од најтивките денови во теснецот од почетокот на конфликтот, без пријавени танкери, објави CNN.

Снимките од веб-страницата за следење бродови покажаа голем број бродови закотвени во близина на теснецот, а некои кружеа за да избегнат влегување во водниот пат.

Мал број помали бродови влегоа во каналот, но повеќето беа реморкери или бродови со иранско знаме.

Порано во текот на денот, два санкционирани танкери што превезуваа течен нафтен гас беа на пат кон Персискиот Залив кога одеднаш беа принудени да се вратат од иранските сили, објави новинската агенција „Тасним“.

Иранскиот корпус на Исламската револуционерна гарда (IRGC) соопшти во саботата дека теснецот повторно е затворен за сообраќај „поради прекршувања на условите за прекин на огнот“ и затоа што „американскиот непријател не ја укина поморската блокада на иранските бродови и пристаништа“.

Иранскиот министер за надворешни работи, Абас Аракчи, во петокот објави дека Ормутскиот теснец ќе биде отворен за сите комерцијални бродови до крајот на прекинот на огнот со Либан, но таа одлука беше поништена во саботата.