Со владините субвенции и нови авиолинии до 4 милиони патници

Македонските аеродроми, годинава, се на пат да достигнат рекорден број патници, а според очекувањата на Владата, вкупниот воздушен сообраќај на скопскиот и охридскиот аеродром би можел да се приближи до границата од четири милиони патници. Заменик-претседателот на Владата и министер за транспорт, Александар Николоски, вели дека значителниот пораст е резултат на мерките за субвенционирање на авиолиниите, чија реализација започна во 2025 година.

Според него, растот е забележлив практично секој месец. Во јули годинава, двата аеродроми заедно регистрирале 21 % повеќе патници во споредба со истиот период лани, додека во август растот достигнал 31 %. Николоски посочи дека резултатите значително ги надминале првичните очекувања. Кога актуелната Влада го започнала мандатот, годишниот број патници на двата аеродроми бил околу 2,4 милиони. Проекциите биле до крајот на мандатот бројката да се зголеми на околу 3,2 до 3,3 милиони патници. Наместо тоа, границата од три милиони патници била достигната за само една година, а сега, според Николоски, останува да се види дали до крајот на годината ќе биде достигната и бројката од четири милиони.

– Држава со милион и 800 жители има четири милиони патници на двата аеродроми – истакна министерот за транспорт.

Во меѓувреме, Македонија има значајна улога и во снабдувањето со авионско гориво во регионот. Според Николоски, земјата целосно го снабдува приштинскиот аеродром со керозин, додека обезбедува значаен дел од потрошувачката на нишкиот аеродром. Скопскиот аеродром, пак, претставува една од најзначајните бази на „Визер“, а според министерот, авиокомпанијата таму ги користи најновите „ербас A321нео“, кои се поефикасни и имаат помали емисии во споредба со постарите модели.

Значителен пораст бележи и охридскиот аеродром. Очекувањата се дека годинава преку него ќе поминат меѓу 350 и 400 илјади патници, што е повеќекратно над бројката предвидена со концесиските проекции. Кога била дадена концесијата, било предвидено охридскиот аеродром до 2030 година да достигне околу 130.000 патници. Сегашниот тренд, сепак, покажува дека оваа бројка ќе биде надмината многу порано, а Охрид годинава би можел да се доближи до бројот на патници што го има нишкиот аеродром или дури и да го надмине. Поради зголемената побарувачка, постои можност „Визер“ дополнително да го прошири своето присуство во Охрид со поставување уште еден авион во базата.

Паралелно со зголемувањето на бројот на патници, Владата работи и на отворање нови директни авиолинии. Една од дестинациите за која се прецизираат деталите е Дубаи. Николоски смета дека директната линија Скопје – Дубаи би имала значење и за туризмот и за македонскиот бизнис, особено имајќи го предвид зголеменото значење на Обединетите Арапски Емирати како деловен и саемски центар.

Според него, воспоставувањето директна воздушна врска би им овозможило на македонските компании полесен пристап до пазарите во регионот, но истовремено би можело да придонесе и за зголемување на бројот на туристи од Обединетите Арапски Емирати кои ќе ја посетуваат Македонија.