Возрасено лице од округот Даглас во американската држава Колорадо почина од хантавирус, соопштија локалните здравствени власти, наведувајќи дека случајот не е поврзан со неодамнешната епидемија на крузерот „МВ Хондиус“.
Институтот за јавно здравје и животна средина во Колорадо соопшти дека прелиминарните наоди укажуваат дека лицето било изложено на вирусот локално, преку контакт со глодари, што е најчестиот начин на пренесување на хантавирусот во таа американска држава.
„Ризикот за пошироката јавност останува низок“, се вели во соопштението, истакнувајќи дека државните и локалните здравствени оддели спроведуваат истрага, објавува „Деневер 7“, филијала на „Еј-би-си“ за Колорадо.
Властите не го објавија идентитетот на починатиот или датумот на смртта, но потврдија дека случајот не е поврзан со епидемијата на крузерот „Хондиус“.
Службениците велат дека инфекциите со хантавирус се чести во Колорадо, главно во текот на пролетта и летото, и можат да предизвикаат тешки, понекогаш фатални, респираторни заболувања.
Според податоците на американскиот Центар за контрола и превенција на болести (CDC), вкупно 121 случај на хантавирус се пријавени во Колорадо од 1993 до 2023 година, со 76 смртни случаи.
Експертите препорачуваат избегнување контакт со глодари, нивната урина, измет, плунка и материјали за гнездење како најдобра заштита од инфекција.
ИЗДВОЕНИ
Утврдени траги од судијата Ристов на фолиите во кои беа завиткани 350 илјади евра
Граѓаните сами ќе избираат дали ќе одат во пензија на 62 или ќе работат до 73 години
До 20.000 евра за сопствен бизнис, но дали тоа ќе ги задржи младите дома?
14 годишно момче избодено со нож во населбата Ченто, семејството бара пронаоѓање на напаѓачите
