Мистерија околу нападот на летот за Израел: Дали сечилото било во пилотската кабина и како екстремистичкиот копилот се нашол на овој лет?

Има многу непознати за копилотот на летот на „Флајдубаи“ (Flydubai) за Тел Авив, кој вчера се обиде да го урне авионот полн со израелски патници откако го нападна капетанот, а тој, целиот во крв, успеа да ја отвори вратата од кабината и да ги пушти патниците кои го совладаа напаѓачот.

„Тајмс оф Израел“ (Times of Israel) пренесе изјава од неименуван пилот од таа авиокомпанија од Обединетите Арапски Емирати (ОАЕ), кој го опиша копилотот – кој во судирот со патниците бил онесвестен и врзан – како религиозен екстремист.
Тој пилот за израелскиот Канал 16 изјави дека државјанинот на Оман се вработил во „Флајдубаи“ пред само осум месеци.

„Претерано се молеше во текот на целиот ден и одбиваше да се ракува со жени“, изјави пилотот за таа телевизиска станица.

Израелскиот весник „Једиот ахронот“ (Yedioth Ahronoth) се обиде да одговори на неколку прашања во врска со вчерашната драма на небото која заврши со принудно слетување во Саудиска Арабија, а клучните прашања се поврзани токму со оманскиот копилот и со тоа како е можно такво лице да заврши на лет за Израел.

Во изјава за Ројтерс, тројца неименувани израелски функционери изјавија дека властите го истражуваат инцидентот како можен обид за терористички напад. Израелскиот премиер Бенјамин Нетанјаху изјави дека копилотот „изгледа се обидел да го урне авионот“, додека властите на таа земја испитуваат дали дејствувал сам или како дел од поширок план.
„Флајдубаи“ во официјалното соопштение експлицитно порача дека околностите и мотивот за нападот сè уште се непознати.

Прашања кои сè уште се без одговор: Дали осомничениот конкретно побарал да биде распореден на летот за Израел? Дали кај него е пронајдено нешто што би можело да укаже дека однапред го планирал нападот? Кој е воопшто осомничениот?

Зошто имало четворица пилоти во авионот на летот на „Флајдубаи“ до Тел Авив?

Израелски извори го идентификуваа осомничениот копилот на летот како државјанин на Оман, но саудиските власти и „Флајдубаи“ јавно не ја потврдија таа информација.

Мири Регев, министерка за транспорт на Израел, изјави дека авиокомпанијата од ОАЕ го прекршила договорот за воздухопловство меѓу таа земја и Израел со испраќањето на оманскиот пилот на летот за Израел.

Таа изнесе тврдење дека договорот забранува такви распоредувања на летачкиот екипаж бидејќи Израел и Оман немаат дипломатски односи. Поголемиот дел од пилотите на „Флајдубаи“ не се државјани на ОАЕ и доаѓаат од земји ширум светот.

Што користел осомничениот во нападот врз капетанот?

Сè уште не е целосно јасно кој предмет бил користен за нападот врз капетанот Смит Махчар, кој е со потекло од Индија.

Првичната истрага укажува на тоа дека копилотот го удирал или го прободувал со секирата за итни случаи која се наоѓала во кабината и служи за кршење на прозорците на авионот во вонредна ситуација.

Претходните извештаи споменуваа нож или џебен нож, па се поставуваше прашањето како тоа сечило можело да биде внесено во авионот покрај сите аеродромски контроли.