Скопје ќе добие „метро на тркала“ – побрз, посигурен и предвидлив превоз

Градоначалникот на Град Скопје, Орце Ѓорѓиевски, остварил работна средба со проектантите на БРТ-системот (Bus Rapid Transit), на која детално биле презентирани решенијата, намената и техничките аспекти на проектот.

Од Град Скопје информираа дека на средбата се разговарало за трасите, начинот на функционирање, како и за придобивките што овој систем ќе ги донесе за градот и за граѓаните.

Како што наведе скопскиот градоначалник, Орце Ѓорѓиевски, воведувањето на брз, модерен и целосно еколошки автобуски превоз ќе претставува значаен исчекор кон унапредување на јавниот транспорт во Скопје.

БРТ-системот е замислен како „метро на тркала“, со посебни сообраќајни ленти, приоритет на раскрсници и висока фреквенција на возила, што ќе овозможи побрз, посигурен и предвидлив превоз.

Проектот предвидува изградба на две главни линии – Исток – Запад и Север – Југ, воведување современи нископодни автобуси на CNG/хибриден погон, како и поставување паметни станици и информативен систем за патниците. Воедно, системот ќе биде целосно интегриран со управувањето на сообраќајот во градот.

Трасата на БРТ нема да поминува низ средишното зеленило, со што се заштитуваат важни природни ресурси, вклучително и водоснабдувањето на градот. Наместо тоа, системот ќе се движи по крајните сообраќајни ленти, а дополнително ќе се предвиди ново зеленило како природна бариера.

– Со реализацијата на овој проект се очекува значително намалување на сообраќајниот метеж, скратување на времето на патување и намалување на загадувањето. БРТ претставува стратешка инвестиција во иднината на Скопје и чекор кон достигнување европски стандарди во јавниот превоз и урбаното живеење – нагласија од Град Скопје.

(А. П.)