Скопје ја зајакнува својата поврзаност со европското семејство на културата. Скопскиот градоначалник, Орце Ѓорѓиевски, информираше дека е потпишан договор за соработка меѓу Нова Горица – Горица 2025 и Фондацијата Скопје 2028, со кој, како што вели, се отвораат нови можности за нашите уметници, културните институции, независната сцена и за младите.
Според Ѓорѓиевски, со ова партнерство се создава основа за заеднички културни проекти, поврзување на фестивалите, размена на знаења и искуства и подготовка на заеднички апликации за европските фондови.
– Како градоначалник, се залагам меѓународната соработка да донесе конкретни придобивки за нашите граѓани, како повеќе можности за творештво, поголема видливост на нашата култура и партнерства што ќе продолжат и по 2028 година – наведе Ѓорѓиевски.
