Скопје и Анкара ќе се поврзат со директен лет

Македонија и Турција договорија воспоставување директна авиолинија меѓу Анкара и Скопје, која треба да придонесе за подобра поврзаност меѓу двете земји и полесно патување за граѓаните и за бизнис-заедницата.

Информацијата ја соопшти турскиот министер за трговија, Омер Болат, по средбите со македонската делегација во Истанбул.

– Веруваме дека директните летови на „AJet“ на релација Анкара – Скопје ќе дадат значаен придонес за трговијата, инвестициите и поврзаноста меѓу нашите земји – напиша Болат.

Договорот е постигнат во рамките на разговорите меѓу владините претставници на Македонија и на Турција, при што беше нагласена потребата од унапредување на економската соработка и на транспортната поврзаност.

Новата авиолинија треба да овозможи побрзо и поедноставно патување меѓу главните градови на двете земји, а од неа се очекува дополнителен поттик за развој на туризмот, бизнис-контактите и на инвестициите.