Сертификатите за извоз на вино и за земјоделски преработки ќе се издаваат електронски

Процесот на дигитализација продолжува и во земјоделскиот сектор. Компаниите отсега ќе можат електронски да добиваат два сертификати од Државниот инспекторат за земјоделство, без потреба од лично поднесување документи или подигнување на уверенијата во хартиена форма. Новите услуги се достапни преку националниот портал за услуги – uslugi.gov.mk и имаат иста правна важност како и хартиените документи.

Станува збор за уверението за квалитет – сертификат за земјоделски производи, преработки и стоки и за уверението за квалитет В1 – сертификат за извоз на вино, наменети за компаниите од земјоделско-прехранбениот сектор и винската индустрија.

Новите електронски услуги беа промовирани од министерот за дигитална трансформација, Стефан Андоновски, и од директорот на Државниот инспекторат за земјоделство, Ивица Ангеловски.

– Нашата цел е јавните услуги да бидат побрзи, поедноставни и подостапни, а институциите поефикасни и поодговорни. Продолжуваме со дигитализацијата на услугите што имаат директно значење за граѓаните и за стопанството и градиме држава што штеди време и ги намалува трошоците – изјави Андоновски.

Тој нагласи дека побрзите административни постапки значат поголема конкурентност за компаниите, додека дигитализацијата придонесува и за поголема транспарентност, намалување на ризикот од корупција и за поголема доверба во институциите.

Директорот Ангеловски истакна дека со новите услуги се скратува времето за издавање на сертификатите, се елиминира потребата од нивно лично подигнување и се намалуваат трошоците за компаниите.

Дополнително, целосно е дигитализиран и процесот на плаќање на административните такси, кои отсега ќе можат да се плаќаат електронски, преку апликации за електронско банкарство.

– Со овие активности правиме уште еден значаен чекор кон современа, ефикасна и транспарентна јавна администрација, која е во служба на граѓаните и на стопанството – порача Ангеловски.