Се подобруваат условите за учење во „Димитар Миладинов“

Во основното училиште „Димитар Миладинов“ се спроведуваат инфраструктурни зафати за да се подобрат условите за учење, работа и спортување.
Градоначалникот на Општина Центар, Горан Герасимовски, информираше дека во првата фаза се изведува нова фекална мрежа, одвоена од атмосферската, со што се решава долгогодишниот проблем со затнување и прелевање на шахтите. Воедно, се реконструира санитарниот јазол до фискултурната сала, каде што се заменуваат старите водоводни и одводни цевки и се поставуваат нови санитарии.
Се реновираат машката и женската соблекувална, со поставување нова подна подлога и плочки, а просторот дополнително се освежува со молерисување и уредување.

– Во летниот период, локалната самоуправа планира санација во повеќе училишта на своја територија, а во овој објект веќе се реализираат неопходните инфраструктурни зафати. Санацијата на канализациската мрежа во овој објект беше неопходна за да се реши долгогодишниот проблем – нагласи Герасимовски.

Покрај тековните активности, во план е и реконструкција на покривот, како и санација на училниците на третиот кат и на просторијата за наставниците, каде што има прокапување.