Русите тргнаа да ја спасат Куба, се чека реакцијата на американската морнарица

Руски танкер што носи пратка сурова нафта плови кон Куба, додека карипскиот остров, погоден од хроничен недостиг на гориво, бара излез од кризата три месеци откако администрацијата на американскиот претседател Доналд Трамп практично го запре протокот на енергија во земјата.

Според податоците од фирмата за поморска аналитика „Кплер Лтд.“, пристигнувањето на танкер што носи повеќе од 700.000 барели руска сурова нафта се очекува во кубанските води до крајот на март 2026 година, објави „Блумберг“.

Превозот на руска нафта е директен тест за ембаргото на САД и останува неизвесно дали бродот ќе може да се пробие и да го испорача товарот. Американската поморска блокада на Карибите успешно ги одврати бродовите од приближување кон Куба од декември, додека заканата од царини за земјите што го снабдуваат островот го натера Мексико да ги прекине сите пратки на почетокот на февруари.

Мексико стана главен снабдувач на Хавана откако американските сили го заробија венецуелскиот лидер Николас Мадуро претходно оваа година и ги прекинаа испораките на гориво од земјата што беше најблизок сојузник на Куба.

Танкерот „Анатолиј Колодкин“ отплови од руското пристаниште Приморск до комерцијалното пристаниште Матанзас, Куба, во вторник со товар од 730.000 барели руска сурова нафта од Урал. Друг танкер, „Си Хорс“, кој исто така носеше руска сурова нафта минатиот месец, накратко се врати во Куба откако беше принуден да го промени курсот во февруари. Пристигнувањето на двата брода би значела прва голема испорака на гориво по долга пауза. Кубанскиот претседател Мигел Дијаз-Канел минатата недела во Хавана изјави дека земјата не добила пратка три месеци, што е најдолгиот период без увоз на енергија за најмалку 12 години, според Мет Смит, аналитичар во „Кплер“.