Рама го брани проектот за луксузното одморалиште на семејството Трамп во Албанија

Албанскиот премиер Еди Рама денеска застана во одбрана на плановите за масивен туристички комплекс во еколошки важна област, кој се поврзува со семејството на американскиот претседател Доналд Трамп и предизвика гневни протести за време на викендот, но го осуди насилството што се користи против луѓето што се противат на проектот.

Рама ги обвини приватните обезбедувачи за насилството во крајбрежната област Звернец во регионот Валона во јужна Албанија, во кое беше повреден еден грчки државјанин. Но, тој силно ги бранеше плановите за комплекс од 4 милијарди евра, за кој рече дека ќе привлече посетители што трошат многу пари и ќе обезбеди локални работни места, пренесе Катимерини.гр.

Развојот, во еколошки важна област што вклучува залив и привлекува голема популација на птици, предизвика протести од екоактивисти и локални жители, меѓу кои има многу членови на етничкото грчко малцинство во земјата.

Коментарите на Рама следеа по соопштението на грчкото Министерство за надворешни работи во кое се изрази „силна загриженост“ поради насилството во саботата и се поврза прашањето со изгледите на Албанија за приклучување кон Европската Унија.

„Ја нагласуваме потребата од целосно почитување на владеењето на правото, вклучително и заштитата на правата и имотот на членовите на етничкото грчко малцинство, како и важноста од ефикасна заштита на еколошки заштитените подрачја во согласност со европската пракса, чие почитување е предуслов за напредок во процесот на пристапување [на Албанија]“, се вели во соопштението на Министерството за надворешни работи на Грција.

Проектот Зврнец е поврзан со потенцијални инвестиции од ќерката на Трамп, Иванка, и нејзиниот сопруг, Џаред Кушнер.

Водечката еколошка организација, Албанското орнитолошко друштво, остро се спротивстави на развојот и планира протест против него повторно во недела.

Проблеми за семејството Трамп: Отворањето на градилиште за луксузното одморалиште во Албанија се претвори во хаос/ВИДЕО