Програмери, финансиски менаџери и аналитичари меѓу најбараните занимања до 2035 година

Вештачката интелигенција сè повеќе го менува начинот на кој се извршуваат работните задачи, но нејзиниот развој не значи автоматски и исчезнување на работните места. Напротив, за одредени професии што се силно изложени на влијанието на ВИ, се очекува значителен пораст на вработувањето во следната деценија.

Американското Биро за статистика на трудот (БЛС) анализирало 831 професија, од кои 206 ги класифицирало како занимања со многу висока изложеност на вештачка интелигенција. Повеќе од 100 од нив имале просечна годишна плата од најмалку 75.000 долари, а „Бизнис инсајдер“ издвоил десет професии кај кои се очекува раст на вработувањето во периодот од 2025 до 2035 година.

На првото место се софтверските програмери, за кои се предвидуваат околу 174.700 нови работни места и просечна годишна плата од 136.000 долари. Следуваат менаџмент-аналитичарите, со очекувани 109.200 нови работни места и плата од околу 102.000 долари, како и менаџерите за информатички и компјутерски системи, чија просечна годишна заработка достигнува 175.000 долари, со околу 108.100 нови работни места до 2035 година.

Пораст се очекува и кај стручњаците за податоци, за кои се предвидуваат 95.400 нови работни места и просечна плата од 120.000 долари, како и кај финансиските менаџери, со околу 84.900 нови работни места и заработка од 167.000 долари годишно. На листата се и сметководителите и ревизорите, со очекувани 79.400 нови работни места и плата од 84.000 долари, како и стручњаците за управување со проекти, за кои се предвидуваат 73.200 нови работни места и просечна заработка од 102.000 долари.

Меѓу професиите со позитивни прогнози се и аналитичарите на пазарот и маркетинг-стручњаците, со околу 66.300 нови работни места и годишна плата од 79.000 долари, како и стручњаците за човечки ресурси, кај кои се очекува пораст од 60.100 работни места и просечна заработка од 76.000 долари. На десеттото место се универзитетските предавачи во здравствените области, за кои се предвидуваат 49.900 нови работни места и просечна годишна плата од 107.000 долари.

Податоците покажуваат дека високата изложеност на вештачката интелигенција не значи нужно дека некоја професија ќе исчезне. Во многу случаи, ВИ ќе преземе дел од рутинските задачи, но истовремено ќе ја зголеми потребата од стручњаци кои знаат да ја користат технологијата, да анализираат информации и да носат сложени одлуки. Затоа, приспособувањето кон новите технологии и стекнувањето дополнителни вештини ќе бидат клучни за работниците во годините што следуваат.