Продолжува услугата „Итно копче“ во Кисела Вода

Продолжува услугата „Итно копче“ на територијата на Општина Кисела Вода за сите 40 досегашни корисници во нивните домови.

Градоначалничката на Општина Кисела Вода, Бети Стаменкоска- Трајкоска, денеска ги посетила корисничките на оваа услуга, госпоѓите Нада и Љубица.

– Разговаравме топло и искрено за нивното секојдневие. Ми раскажаа колку им значи овој мал уред за нивните мир и сигурност – истакна Стаменкоска-Трајкоска.

Таа наведе дека оваа важна поддршка за лицата над 65 години се реализира преку успешната соработка со Црвениот крст.

– Нашите повозрасни граѓани имаат на располагање 20 лиценцирани негуватели. Преку уредот, тие добиваат 24/7 поддршка за секоја итна состојба. Обучените лица нудат прва помош и прва психолошка поддршка. Обезбеден е и транспорт до здравствена установа со специјални возила кога е најпотребно. За сè да функционира беспрекорно, аларм-уредите имаат бесплатна дневна техничка поддршка. Важно е нашите највозрасни жители да имаат спокојна старост. Важно е да знаат дека во секој момент имаат стручен тим подготвен да реагира и да им помогне. Општина Кисела Вода се грижи посветено за мирна и достоинствена старост – објасни Стаменкоска- Трајкоска.