Поранешниот британски министер за здравство потврди дека ќе се кандидира за нов лидер на Лабуристите

Поранешниот британски министер за здравство Вес Стритинг денес потврди дека ќе се кандидира доколку се распишат избори за нов лидер на Лабуристичката партија.

На прашањето дали би учествувал во евентуална трка за лидерство на партијата, Стритинг рече дека прво треба да се организира натпревар со најдобрите кандидати и дека тој ќе учествува, објави „Скај њуз“.

Додаде дека не сака итни избори за нов лидер бидејќи „тоа не е во интерес на партијата или земјата“, пред градоначалникот на Манчестер, Енди Бернам, да има можност да се врати во парламентот.

Според него, нова трка за лидер на партијата без јасен процес само би ја продолжила нестабилноста и неизвесноста.

„Ако мислите дека сте доволно добри за најважната функција и имате вистински идеи за земјата, тогаш треба да бидете подготвени да ги презентирате, да ги тестирате во конкуренција и да ги добиете изборите“, рече Стритинг.

Тој го повтори својот повик до лидерот на лабуристите и британски премиер Кир Стармер да утврди јасен распоред за избор на лидер и да им даде на министрите слобода да го поддржат кандидатот по свој избор како иден премиер и лидер на партијата.

Според „Скај њуз“, сè уште не е започнат официјален предизвик за замена на лидерот.

Зборувајќи за можна кандидатура за лидерство на лабуристите, Стритинг рече дека знае како да победи.

Осврнувајќи се на слабите резултати на Лабуристичката партија на локалните избори, поранешниот британски министер за здравство рече дека во неговата изборна единица Илфорд Норт партијата изгубила само три советници, значително помалку отколку во многу други делови од земјата.

„Знам како да победам без разлика дали нашите противници се позиционирани десно или лево од нас“, рече тој.

Стритинг ја предупреди партијата да не се обидува да имитира други политички опции за да освои гласачи.

„Ќе ги добиеме следните општи избори со тоа што ќе бидеме Лабуристичка партија“, рече Стритинг.

Зборувајќи на конференција на Групата за напредок поврзана со Лабуристичката партија, Стритинг рече дека Велика Британија треба да изгради нов посебен однос со Европската Унија бидејќи иднината на Велика Британија е во Европа и еден ден назад во Европската Унија.

Потенцијалниот кандидат за лидерство на Лабуристичката партија ја опиша одлуката за напуштање на ЕУ како „катастрофална грешка“.

„Британскиот народ сè повеќе сфаќа дека во еден опасен свет мора да се здружиме за да ја обновиме нашата економија и трговија, но и да ја подобриме нашата одбрана од заедничките закани како што се руската агресија и повлекувањето на политиката „Америка на прво место“, рече тој.

Поранешниот британски министер за здравство додаде дека Лабуристите „веќе не можат да молчат“ за последиците од Брегзит.

„Треба повторно да го поставиме аргументот за враќање во ЕУ“, заклучи Стритинг.

Британскиот премиер Кир Стармер се соочува со притисок во владата да го преиспита времето на неговата оставка, откако повеќе од 80 пратеници на Лабуристите побараа негова оставка по катастрофалниот настап на неговата партија на изборите низ Англија, Шкотска и Велс минатата недела.

Стармер во понеделник изјави дека е длабоко повреден од лошиот настап на Лабуристите на локалните избори и дека ја презема одговорноста за тоа, но дека нема намера да поднесе оставка, објави „Танјуг“.